‘గబ్బర్ సింగ్’ జంటపై సినిమా పుకార్లు!

Posted: 09/24/2015 07:17 PM IST

Pawan kalyan harish shankar tie for another movie tollywood gossips

‘గబ్బర్ సింగ్’.. పవర్ స్టార్ పవన్ కల్యాణ్, దర్శకుడు హరీష్ శంకర్ కాంబినేషన్ లో వచ్చిన ఈ సినిమా సంచలన విజయం నమోదు చేసుకుంది. దీంతో.. పవన్-హరీష్ కాంబో హిట్ జాబితాల్లోకి చేరిపోయింది. ఇప్పుడు ఈ జంటపై కొన్ని పుకార్లు షికార్లు చేస్తున్నాయి. వీరిద్దరి కాంబినేషన్లో మరో సినిమా తెరకెక్కనుందనే ప్రచారం ఇప్పుడు ఇండస్ట్రీలో తెగ చక్కర్లు కొడుతోంది. ఈ ప్రాజెక్టుకు సంబంధించి ప్రీ-ప్రొడక్షన్ పనులను కూడా రహస్యంగా జరుపుతున్నారని చెప్పుకుంటున్నారు. ఈ ఊహాగానాలు తెరమీదకి రావడానికి గల కారణం ఏమిటంటే.. ఆయా సందర్భాల్లో నిర్మాత దిల్ రాజు, డైరెక్టర్ హరీష్ శంకర్ చేసిన ప్రకటనలే!

ఓ సందర్భంలో.. తాను పవన్ కల్యాణ్ కోసం ఒక కథను సిద్ధ చేసుకున్నానీ హరీష్ శంకర్ పేర్కొన్నాడు. పవన్ కథను విని, గ్రీన్ సిగ్నల్ ఇస్తే ఆ సినిమాను తెరకెక్కించాలని అనుకుంటున్నానని తెలిపాడు. అంతేకాదు.. తాను ఎప్పుడూ పవన్ కి ఒక ఫోన్ కాల్ దూరంలోనే వున్నానంటూ తరచూ పేర్కొన్న సందర్భాలూ చాలానే వున్నాయి. అదే సమయంలో.. తన నిర్మాణంలో ఒక సినిమా చేయడానికి పవన్ గ్రీన్ సిగ్నల్ ఇచ్చినట్లు దిల్ రాజు ప్రకటించాడు. త్వరలోనే ఆ సినిమాకు సంబంధించిన వివరాలను వెల్లడిస్తానని వెల్లడించాడు. ఇలా ఈ విధంగా వారిద్దరు ప్రకటనలు చేసిన నేపథ్యంలో.. దిల్ రాజు నిర్మాతగా, హరీష్ శంకర్ దర్శకుడిగా పవన్ తో ఓ సినిమా చేయనున్నారనే టాక్ ఫిల్మ్ నగర్లో మొదలైంది. మరి.. ఈ వార్తల్లో ఎంతవరకు నిజముందో తెలియాలంటే.. కొన్నాళ్లు ఆగాల్సిందే!

ఇదిలావుండగా.. దిల్ రాజు నిర్మాతగా, హరీశ్ శంకర్ దర్శకత్వంలో తెరకెక్కిన ‘సుబ్రమణ్యం ఫర్ సేల్’ చిత్రం గురువారం విడుదలై మంచి టాక్ తెచ్చుకుంది. ఈ సినిమా కలెక్షన్ల పరంగా బాక్సాఫీస్ దగ్గర భారీ వసూళ్లు రాబట్టవచ్చునని ట్రేడ్ వర్గాలు తెలుపుతున్నాయి. ఈ చిత్రం విజయం సాధించడంతో మరో మూవీకి ప్లాన్ చేస్తున్నట్లు తెలిసింది. ఆ సినిమా పవన్ తోనే వుంటుందని అంతర్గత వర్గాలు అంచనా వేస్తున్నాయి.