‘కుమారి 21 F’ను ప్రమోట్ చేయనున్న ఎన్టీఆర్

Posted: 09/05/2015 03:47 PM IST

ప్రముఖ దర్శకుడు సుకుమార్ తొలిసారిగా నిర్మాతగా మారి నిర్మిస్తున్న తాజా చిత్రం ‘కుమారి 21F’. రాజ్ తరుణ్ హీరోగా నటిస్తున్న ఈ చిత్రానికి పల్నాటి సూర్యప్రతాప్ దర్శకత్వం వహిస్తున్నాడు. రత్నవేలు సినిమాటోగ్రఫి, దేవిశ్రీప్రసాద్ సంగీతం అందిస్తున్నారు.

పాట మినహా చిత్రీకరణ పూర్తయింది. బ్యాలెన్స్ పాటను త్వరలోనే చిత్రీకరించి అక్టోబర్‌లో దసరా కానుకగా చిత్రాన్ని విడుదల చేయడానికి చిత్ర యూనిట్ సన్నాహాలు చేస్తున్నారు. అయితే ఇందులో భాగంగానే ఓ ప్రమోషనల్ సాంగ్ ను రూపొందించడానికి సుకుమార్ ఏర్పాట్లు చేస్తున్నారు.

ఈ పాటను యంగ్ టైగర్ ఎన్టీఆర్ చేతుల మీదుగా విడుదల చేయించాలని సుకుమార్ భావిస్తున్నాడట. ప్రస్తుతం ఎన్టీఆర్ తో సుకుమార్ ఓ సినిమా తెరకెక్కిస్తున్న విషయం తెలిసిందే. ఆ స్నేహంతోనే ఈ ప్రమోషనల్ సాంగ్ ను ఎన్టీఆర్ చేతుల మీదుగా విడుదల చేయించాలని సుకుమార్ భావిస్తున్నాడట.

ఇందుకోసం దేవిశ్రీప్రసాద్ ఓ మాంచి కిక్కిచ్చే ప్రమోషనల్ సాంగ్ ను రూపొందించబోతున్నట్లుగా తెలిసింది. త్వరలోనే ఈ చిత్రానికి సంబంధించిన అన్ని వివరాలు అధికారికంగా ప్రకటించనున్నారు. ఎన్టీఆర్, సుకుమార్ ల సినిమా షూటింగ్ కూడా శరవేగంగా జరుగుతోంది. వచ్చే ఏడాది సంక్రాంతికి ఈ సినిమా విడుదల కానుంది.