ఐశ్వర్యరాయ్ స్థానాన్ని కొట్టేసిన స్టార్ హీరోయిన్?

Posted: 07/20/2015 07:33 PM IST

మహేష్ బాబు, నాగార్జున, శృతిహాసన్, ఐశ్వర్యరాయ్ లు ప్రధాన పాత్రలలో ప్రముఖ తమిళ దర్శకుడు మణిరత్నం దర్శకత్వంలో ఓ చిత్రం తెరకెక్కనుందని గతంలో వార్తలొచ్చాయి. కానీ ఆ ప్రాజెక్టు ఆగిపోయిన విషయం తెలిసిందే. అయితే ఆ ప్రాజెక్టును మణిరత్నం మళ్లీ ప్రారంభించినట్లుగా తెలిసింది. ఇపుడు అదే ప్రాజెక్టును తమిళ యువ హీరోలతో తెరకెక్కించనున్నారని సమాచారం.

నాగార్జున, మహేష్ ల స్థానంలో కార్తీ, దుల్కర్ సల్మాన్ హీరోలుగా నటించనున్నారు. ఐశ్వర్య రాయ్ స్థానంలో నయనతారను ఎంపిక చేసినట్లుగా తెలిసింది. ఇటీవలే ఈ చిత్ర కథ విని, తన పాత్ర బాగా నచ్చడంతో వెంటనే ఈ ప్రాజెక్టుకు నయనతార గ్రీన్ సిగ్నల్ ఇచ్చినట్లుగా తెలిసింది. త్వరలోనే ఈ ప్రాజెక్టు సెట్స్ పైకి వెళ్లనుంది.

ప్రస్తుతం నయనతార చేతిలో అరడజనుకు పైగా చిత్రాలున్నాయి. తెలుగులో కూడా పలు సినిమా అవకాశాలు నయనతార కాల్ షీట్స్ కోసం ఎదురుచూస్తున్నాయి. ప్రస్తుతం నయనతార నటిస్తున్న ‘మాయ’, ‘ఇదు నమ్మ ఆలు’ చిత్రాలు విడుదలకు సిద్ధమవుతున్నాయి. త్వరలోనే ప్రేక్షకుల ముందుకు రానున్నాయి.