ఇద్దరు ముఖ్యమంత్రులకు ‘శ్రీమంతుడు’ స్పెషల్ షో

Posted: 07/21/2015 05:02 PM IST

‘మిర్చి’ ఫేం ప్రముఖ దర్శకుడు కొరటాల శివ దర్శకత్వంలో మహేష్ బాబు, శృతిహాసన్ జంటగా నటించిన తాజా చిత్రం ‘శ్రీమంతుడు’. ఈ చిత్రాన్ని భారీ బడ్జెట్ తో మైత్రి మూవీమేకర్స్‌, ఎం.బి. ఎంటర్‌టైన్‌మెంట్‌ ప్రై.లి. బ్యానర్స్‌పై నిర్మాతలు నవీన్‌ యెర్నేని, వై. రవిశంకర్‌, మోహన్‌ సంయుక్తంగా నిర్మించారు.

దేవిశ్రీప్రసాద్ సంగీతం అందించిన ఈ చిత్ర ఆడియో ఇటీవలే గ్రాండ్ గా విడుదలై భారీ హిట్టును సొంతం చేసుకుంది. అలాగే ఈ చిత్ర థియేటర్ ట్రైలర్ కు భారీ క్రేజ్ వచ్చింది. ఎక్కడో విదేశాల్లో వుండే వాళ్లంతా వారి సొంత ఊరిని దత్తత తీసుకుంటే బాగుంటుందనే కథాంశంతో రూపొందిన ‘శ్రీమంతుడు’ చిత్రంపై భారీ అంచనాలు ఏర్పడ్డాయి.

ఈ చిత్రాన్ని ఆంధ్రప్రదేశ్, తెలంగాణ ముఖ్యమంత్రులైన చంద్రబాబు నాయుడు, కె.చంద్రశేఖర్ రావు గార్లకు ప్రత్యేకంగా ‘శ్రీమంతుడు’ సినిమాను చూపించడానికి చిత్ర యూనిట్ సన్నాహాలు చేస్తున్నట్లుగా తెలిసింది. ఈ సినిమాలో ఊరిని దత్తత తీసుకోవడం అనే ఒక మంచి మెసేజ్ వుండటంతో.. ఇరు రాష్ట్రాల ముఖ్యమంత్రులను ప్రత్యేకంగా ఈ సినిమాను చూడటానికి ‘శ్రీమంతుడు’ దర్శకనిర్మాతలు ఆహ్వానించనున్నారు.

ఇప్పటికే విడుదలైన పాటలు, ట్రైలర్లు యూట్యూబ్ లో భారీగా క్రేజ్ ను సొంతం చేసుకున్నాయి. జగపతి బాబు, రాజేంద్రప్రసాద్, సుకన్య, పూర్ణ తదితరులు ముఖ్య పాత్రలలో నటించారు. ఈ చిత్రాన్ని ఆగష్టు 7న ప్రపంచ వ్యాప్తంగా భారీ ఎత్తున విడుదల చేయనున్నారు.