రెజీనాతో గోపిచంద్ రొమాన్స్ చేయనున్నాడా?

Posted: 07/02/2015 04:26 PM IST

గోపిచంద్ హీరోగా ‘పిల్లా నువ్వులేని జీవితం’ ఫేం దర్శకుడు ఏఎస్ రవికుమార్ చౌదరి దర్శకత్వంలో ఓ చిత్రం తెరకెక్కనున్న విషయం తెలిసిందే. ఇటీవలే ఈ చిత్ర ముహూర్త కార్యక్రమాలు ఘనంగా జరిగాయి. ఈ ప్రాజెక్టు లాంఛనంగా ప్రారంభమయ్యింది. ప్రస్తుతం ప్రీ ప్రొడక్షన్ పనులు చివరి దశకు చేరుకున్నాయి.

ఈ సినిమా రెగ్యులర్ షూటింగ్ జులై 15 నుంచి ప్రారంభం కానుంది. ‘లౌక్యం’, ‘జిల్’ వరుస హిట్ చిత్రాల తర్వాత గోపిచంద్ నటిస్తున్న ఈ చిత్రంపై భారీ అంచనాలు నెలకొన్నాయి. అయితే ఇందులో గోపిచంద్ సరసన రెజీనాను హీరోయిన్ గా ఎంపిక చేసినట్లుగా తెలిసింది.

రవికుమార్ చౌదరి దర్శకత్వంలో వచ్చిన ‘పిల్లా నువ్వులేని జీవితం’ సినిమాలో రెజీనా హీరోయిన్ గా నటించింది. ఇపుడు మళ్లీ ఈ సినిమాకు సెంటిమెంట్ గా భావించి రెజీనాను అప్రోచ్ అయ్యాడట రవికుమార్. రవికుమార్ చెప్పిన స్టొరీ లైన్ బాగా నచ్చడంతో ఈ సినిమా చేయడానికి రెజీనా త్వరలోనే గ్రీన్ సిగ్నల్ ఇవ్వడానికి సిద్దంగా వున్నట్లుగా తెలిసింది.

త్వరలోనే ఓ అధికారిక ప్రకటన విడుదల చేయనున్నారు. భవ్య క్రియేషన్స్ బ్యానర్ పై ఈ చిత్రాన్ని నిర్మిస్తున్నారు. గోపిచంద్ ప్రస్తుతం బి.గోపాల్ సినిమా షూటింగ్ లో బిజీగా వున్నాడు. అలాగే రెజీనా కూడా వరుస సినిమాలతో బిజీగా వుంది.