నోరూరించి నోటికందకుండా చేసిన త్రిష

Posted: 05/11/2015 01:04 PM IST

సౌత్ ఇండియన్ స్టార్ హీరోయిన్ త్రిష పెళ్లి ఇటీవలే క్యాన్సిల్ అయిన విషయం అందరికి తెలిసిందే. ఈ విషయాన్ని స్వయంగా త్రిష మరియు త్రిష తల్లి ఉమా అధికారికంగా ప్రకటించినా కూడా మళ్లీ త్రిష పెళ్లిపై గుసగుసలు వినిపిస్తున్నాయి. మొన్నటి వరకు త్రిష పెళ్లి ఆగిపోయిందంటూ వార్తలొస్తే... ఇపుడేమో త్రిష తన సినిమాలను ఎందుకు వదులుకుంటుందోనని వార్తలొస్తున్నాయి. మొత్తానికి త్రిష మాత్రం ప్రతిరోజు వార్తల్లో హాట్ టాపిక్ గా మారుతుంది.

వరుణ్ మాణియన్ తీయబోయే ఓ సినిమా నుంచి త్రిష తప్పుకుందని వార్తలొచ్చిన విషయం తెలిసిందే. కానీ ఈ విషయంపై త్రిష మాత్రం ‘అసలు ఈ సినిమా తాను ఒప్పకుంటేనే కదా తప్పుకోవడానికి’ అంటూ చెబుతోంది. అంటే వరుణ్ సినిమా త్రిష ఒప్పుకోకపోవడంతో ప్రస్తుతం ఆ ప్రాజెక్టు హీరోయిన్ తాప్సీకి వరించింది. ఇదిలా వుంటే సెల్వ రాఘవన్ సినిమా నుంచి కూడా త్రిష తాజాగా తప్పుకుంది.

సెల్వరాఘవన్ దర్శకత్వంలో శింబు, త్రిష హీరోహీరోయిన్లుగా తాజాగా ఓ చిత్రం తెరకెక్కబోతుందనే విషయం తెలిసిందే. అన్ని కార్యక్రమాలు పూర్తి చేసుకొని, మరికొద్ది రోజుల్లో సెట్స్ పైకి వెళ్లే సమయంలో... త్రిష ఈ ప్రాజెక్టు నుంచి తప్పుకుంది. త్రిష ఈ ప్రాజెక్టు తప్పుకోవడానికి గల కారణం.. ఈ సినిమా నిర్మాత వరుణ్ మాణియన్ కు మంచి స్నేహితుడట. అందుకే భవిష్యత్తులో మళ్లీ ఏమైనా సమస్యలు వస్తాయేమోనని భావించి త్రిష ఈ ప్రాజెక్టు నుంచి తప్పుకుందంటూ వార్తలొస్తున్నాయి.

కానీ ఈ విషయంపై త్రిష స్పందన మరో విధంగా వుంది. సెల్వా తన ఫేవరెట్ దర్శకుడని, ఆయన సినిమాలో నటించడం తనకెప్పుడు సంతోషమేనని.. అయితే కాల్ షీట్స్ సమస్య కారణంగా ఈ ప్రాజెక్టు నుంచి తప్పుకున్నానని త్రిష తెలిపింది. మరోసారి సెల్వా దర్శకత్వంలో నటించే అవకాశం వస్తే తప్పకుండా చేస్తానని త్రిష చెబుతోంది. మరి ఇప్పటికైనా ఈ అమ్మడిపై వస్తున్న వార్తలు ఆగిపోతాయో లేదో చూడాలి.

ప్రస్తుతం తెలుగులో త్రిష నటించిన ‘లయన్’ సినిమా విడుదలకు సిద్ధంగా వుంది. అలాగే ఇటీవలే సుందర్ సి దర్శకత్వంలో తెరకెక్కనున్న ‘అరణ్మనై2’ సినిమాలో త్రిష ఓ ప్రధాన పాత్రలో నటించనుంది. త్వరలోనే ఈ ప్రాజెక్టు సెట్స్ పైకి వెళ్లనుంది.