తీన్ మార్ భామతో గబ్బర్ సింగ్ రొమాన్స్

Posted: 04/08/2015 04:58 PM IST

‘గోపాల గోపాల’ చిత్రం తర్వాత పవన్ కళ్యాణ్ చేయబోయే సినిమా ఏమిటా అని అభిమానులు ఎంతో ఆతృతగా ఎదురుచూస్తు వున్నారు. ‘గబ్బర్ సింగ్’ చిత్రానికి సీక్వెల్ గా ‘గబ్బర్ సింగ్2’ చిత్రం రూపొందనున్న విషయం తెలిసిందే. బాబీ దర్శకత్వంలో శరత్ మరార్ నిర్మించనున్న ఈ ప్రాజెక్టు సెట్స్ పైకి వెళ్లేందుకు సిద్ధంగా వుంది. కానీ పవన్ ఇంకా ఈ ప్రాజెక్టు కోసం సిద్ధమవడం లేదు.

అలాగే అతి త్వరలోనే పవన్ కళ్యాణ్ తో ఓ సినిమా చేస్తానని ప్రముఖ దర్శకుడు దాసరి నారాయణ రావు ప్రకటించిన విషయం తెలిసిందే. కానీ ఈ విషయంపై పవన్ ఇంకా ఎలాంటి గ్రీన్ సిగ్నల్ ఇవ్వలేదు. పవన్ గ్రీన్ సిగ్నల్ ఇచ్చిన ‘గబ్బర్ సింగ్2’ ప్రాజెక్టు మాత్రం ఇంకా సెట్స్ పైకి వెళ్లడం లేదు.

ఇదిలా వుంటే ‘గబ్బర్ సింగ్2’ సినిమాలో హీరోయిన్ అనీషా ఆంబ్రోస్ ను ఎంపిక చేసిన విషయం అందరికి తెలిసిందే. ఈ అమ్మడు ఇటీవలే ‘గోపాల గోపాల’ సినిమాలో ఓ న్యూస్ రీడర్ పాత్రలో కనిపించింది. నటిగా మంచి మార్కులే పడ్డా... పవన్ పక్కన హీరోయిన్ గా సరిపోదేమో అనే వార్తలొచ్చాయి. దీంతో ఈ అమ్మడిని మరో స్టార్ హీరోయిన్ తో రీప్లేస్ చేయడానికి చిత్ర యూనిట్ సన్నాహాలు చేస్తున్నారు.

పవన్ కళ్యాణ్ పక్కన హీరోయిన్ గా త్రిషను ఎంపిక చేసినట్లుగా తెలిసింది. పవన్, త్రిషల కాంబినేషన్లో ఇప్పటికే ‘తీన్ మార్’ చిత్రం వచ్చింది. పవన్ ఇందులో మైఖేల్ గా నటించగా... మీరా పాత్రలో త్రిష నటించింది. ఈ సినిమా కమర్షియల్ హిట్ సాధించకపోయినా... మంచి విజయం సాధించింది. పైగా వీరిద్దరి కెమిస్ట్రీ ఈ సినిమాలో చాలా బాగుండటంతో... ‘గబ్బర్ సింగ్2’లో త్రిష అయితేనే బాగుంటుందని చిత్ర యూనిట్ భావిస్తున్నట్లుగా సమాచారం. త్వరలోనే ఈ విషయంపై ఓ అధికారిక ప్రకటన వెలువడనుంది.

ప్రస్తుతం ఈ చిత్రానికి సంబంధించిన స్ర్కిప్టు పనులు పూర్తయ్యాయి. నటీనటులు, సాంకేతిక నిపుణుల ఎంపిక మరియు లొకేషన్ల ఫైనలైజ్ జరుగుతోంది. దేవిశ్రీప్రసాద్ సంగీతం అందించనున్నాడు. త్వరలోనే పూర్తి వివరాలు ప్రకటించనున్నారు.