ఎన్టీఆర్ కొత్త సినిమా టైటిల్ ఇదేనా?

Posted: 04/06/2015 04:01 PM IST

‘టెంపర్’ వంటి బ్లాక్ బస్టర్ హిట్ చిత్రం తర్వాత యంగ్ టైగర్ ఎన్టీఆర్ హీరోగా ప్రముఖ దర్శకుడు సుకుమార్ దర్శకత్వంలో ఓ చిత్రం తెరకెక్కుతున్న విషయం తెలిసిందే. శ్రీవెంకటేశ్వర సినీచిత్ర ఇండియా లిమిటెడ్ పతాకంపై భారీ చిత్రాల నిర్మాత బి.వి.ఎస్.ఎన్.ప్రసాద్ నిర్మిస్తున్న ఈ చిత్రానికి దేవిశ్రీప్రసాద్ సంగీతం అందిస్తున్నారు.

ఈ సినిమా మ్యూజిక్ సిట్టింగ్స్ కోసం ఇటీవలే చిత్ర దర్శకుడు సుకుమార్, సంగీత దర్శకుడు దేవిశ్రీప్రసాద్ స్పెయిన్ వెళ్లారని తెలిసింది. అయితే ఈ సినిమాలో ఎన్టీఆర్ కు తండ్రి పాత్రలో జగపతి బాబు నటిస్తున్నడనే విషయం తెలిసిందే. దీంతో ఈ సినిమా ఫాదర్ సెంటిమెంట్ తో కూడిన తరహాలో వుండబోతుందని వార్తలొచ్చాయి.

ఈ వార్తలు నిజమేనన్నట్లుగా తాజాగా ఈ చిత్రానికి సంబంధించి ఓ టైటిల్ ను రిజిస్టర్ చేయించినట్లుగా తెలిసింది. ఈ చిత్రంకోసం నిర్మాత ప్రసాద్ ఫిల్మ్ ఛాంబర్ లో ‘నాన్నకు ప్రేమతో’ అనే టైటిల్ ను రిజిస్టర్ చేయించినట్లుగా తెలిసింది. కానీ ఇంకా చిత్ర యూనిట్ ఎలాంటి అధికారిక ప్రకటన విడుదల చేయలేదు.

ప్రస్తుతం ఈ చిత్ర షూటింగ్ శరవేగంగా సాగుతోంది. ఇందులో తొలిసారిగా ఎన్టీఆర్ సరసన రకూల్ ప్రీత్ సింగ్ హీరోయిన్ గా నటిస్తుంది. ఇందులో ఎన్టీఆర్ చాలా స్టైలిష్ గా కనిపించనున్నాడని సమాచారం. త్వరలోనే అన్ని వివరాలు అధికారికంగా ప్రకటించనున్నారు.