నిత్యా కన్మణిని కాదల్ కన్మణిగా మార్చేసిన మణిరత్నం

Posted: 02/11/2015 01:33 PM IST

‘రోజా’, ‘గీతాంజలి’, ‘సఖి’ వంటి ఎన్నో అద్భుతమైన చిత్రాలను తెరకెక్కించిన తమిళ దర్శకుడు మణిరత్నం గతకొద్ది కాలంగా ఫ్లాపులతో సతమతమవుతున్నాడు. ఇటీవలే మణిరత్నం తీసిన 'కడలి' సినిమా ఫ్లాప్ అయ్యింది. దీంతో ఈసారి ఎలాగైనా హిట్టు కొట్టాలని ఆశతో వున్నాడు

మణిరత్నం దర్శకత్వంలో మలయాళ సూపర్ స్టార్ మమ్ముట్టి తనయుడు దుల్కర్ సల్మాన్, నిత్యామీనన్ హీరోహీరోయిన్లు గా ఓ చిత్రం రూపొందుతున్న విషయం తెలిసిందే. ఈ చిత్ర షూటింగ్ దాదాపు చివరి దశకు చేరుకుందని, నిర్మాణాంతర కార్యక్రమాలు కూడా మొదలయ్యాయని సమాచారం.

లవ్, రొమాంటిక్ ఎంటర్ టైనర్ గా రూపొందుతున్న ఈ చిత్రం గతంలో మణిరత్నం రూపొందించిన ‘అలప్పాయుదే’ సినిమా తరహాలోనే వుండబోతుందని తెలిసింది. తెలుగు, తమిళ, మలయాళం భాషలలో ఒకేసారి విడుదల చేయనున్నారు. అయితే ఈ చిత్రానికి ఇంతకు ముందు ‘ఓకే కణ్మని’ అనే టైటిల్ అనుకున్నారు. కానీ తాజాగా ‘ఓ కాదల్ కన్మణి’ అనే టైటిల్ ను ఖరారు చేసారు.

ఈ చిత్రాన్ని తెలుగులో 'ఒకే బంగారం' పేరుతో విడుదల చేయనున్నారు. ఈ చిత్ర తెలుగు వెర్షన్ పంపిణీ హక్కులను డిస్ట్రిబ్యూటర్ దిల్ రాజు సొంతం చేసుకున్నాడని తెలిసింది. ఈ విషయంపై త్వరలోనే ఓ అధికారిక ప్రకటన వెలువడనుంది. ఈ చిత్రానికి పి.సి. శ్రీరామ్ సినిమాటోగ్రఫీ, ఏఆర్ రెహమాన్ సంగీతాన్ని అందిస్తున్నారు. త్వరలోనే ఈ చిత్రాన్ని విడుదల చేయనున్నారు.