ముచ్చటగా మూడోసారి ఆ హీరోతోనే కమిట్ అయింది!

Posted: 02/09/2015 12:50 PM IST

Anushka shetty singham 3 sequel movie surya director hari kollywood gossips

మూడుపదుల వయస్సు దాటిన హీరోయిన్లందరూ ఇండస్ట్రీ నుంచి క్రమంగా తప్పుకుంటుంటే.. బొమ్మాళీ అనుష్క మాత్రం వరుసగా మూవీలు చేసుకుంటూ ఫుల్ బిజీ అయిపోతోంది. ఓవైపు ఈ అమ్మడు ఇంటివాళ్లు ఆమె పెళ్లి గురించి ఆలోచిస్తుంటే.. ఈ స్వీటీ మాత్రం తనకేమీ తెలియదన్నట్టుగా వచ్చిన ఆఫర్లన్నింటికీ గ్రీన్ సిగ్నల్ ఇచ్చేస్తోంది. పైగా.. మరే హీరోయిన్ ఇంతవరకు సాధించని రికార్డులన్నింటికీ తన ఖాతాలో జమ చేసుకుంటోంది. ఇప్పటికే భారీ ప్రతిష్టాత్మక చిత్రాలైన ‘బాహుబలి’, ‘రుద్రమదేవి’ చిత్రాల్లో నటిస్తున్న ఈ అమ్మడు.. మరో అరుదైన ఘనతను పొందుతున్నట్లు సమాచారం!

తమిళంలో సూర్య హీరోగా వచ్చిన ‘సింగం’, ‘సింగం-2’ చిత్రాలు మంచి విజయాలను నమోదు చేసుకున్న విషయం తెలిసిందే! ఆ రెండు మూవీల్లోనూ అనుష్క కథానాయికగా నటించింది. ఇక ఈ చిత్రాలను తెరకెక్కించిన దర్శకుడు హరి.. ‘సింగం-3’ని రూపొందించాలనే సన్నాహాల్లో వున్నట్లు చెన్నై ఇండస్ట్రీ వర్గాలు తెలుపుతున్నాయి. ఇదివరకు వచ్చిన రెండు మూవీల్లోనూ సూర్య-అనుష్క జంట బాగా కుదరడంతోపాటు విజయాలను సాధించిన నేపథ్యంలో.. ఈ మూడో సీక్వెల్ మూవీలోనూ ఈ జంటనే తీసుకోవాలని దర్శకుడు నిర్ణయం తీసుకున్నాడట! దీంతో అతడు ఈ మూవీ స్ర్కిప్ట్’ను రెడీ చేసే పనిలో పడ్డాడు.

ఈ మూవీలోనూ సూర్య మళ్లీ పవర్ ఫుల్ పోలీస్ ఆఫీసర్’గా నటిస్తుండగా.. అతనికి జోడీగా అనుష్క నటించనున్నట్లు సమాచారం! అయితే.. ఇందుకు సంబంధించిన అధికారిక ప్రకటన ఇంకా వెలువడాల్సి వుంది. ఒకవేళ ఈ వార్తలు నిజమైతే.. ఒక సినిమా మూడు భాగాలలోనూ కథానాయికగా నటించిన క్రెడిట్ ఈ అమ్మడికే సొంతం అవుతుంది. ఇదిలావుండగా.. ఇటీవలే ఈ అమ్మడు తెలుగులోనూ ఓ మూవీ కమిట్ అయినట్లు వార్తలొస్తున్నాయి.