కేరళలో చిరు స్పా థెరపీ..!!

Posted: 02/02/2015 03:45 PM IST

Megastar chiranjeevi kerala spa treatment 150 movie plan

మెగాస్టార్ చిరంజీవి గతకొన్నాళ్ల నుంచి కేరళలోనే వుంటున్నారు. పైగా.. అక్కడ కొన్ని ప్రత్యేక కార్యక్రమాల్లోనూ ఈయన నిమగ్నమైనట్లు వార్తలొస్తున్నాయి. ఇంతకీ అవేంటనీ ఆరా తీస్తే.. చిరు అక్కడ ‘స్పా’ థెరపీ తీసుకుంటున్నారని అంటున్నారు. తన 150వ చిత్రం కోసం చిరు కాస్త స్టైలిష్’గా, యంగ్ హీరోలకు ధీటుగా వుండేలా బాడీని బిల్డప్ చేసుకోవడానికి చిరు కేరళలో ప్రత్యేక వైద్యం చేయించుకుంటున్నారని ఇండస్ట్రీలో గుసగుసలు వినిపిస్తున్నాయి.

సినిమాల నుంచి దూరమై రాజకీయాల్లోకి వచ్చిన అనంతరం చిరంజీవి తన ఫిజిక్’పై అంతగా దృష్టి సారించలేకపోయారు. తద్వారా ఈయన విపరీతంగా బరువు పెరిగిపోయారు. ఇప్పుడు తన బరువును తగ్గించుకోవడం కోసమే ఆయన కేరళకు వెళ్లినట్లు చెప్పుకుంటున్నారు. అలాగే స్టైలిష్ లుక్’ని పొందడం కోసం ఆయన అక్కడి స్పాలో డైటింగులతో కూడిన ఆయుర్వేద చికిత్స తీసుకుంటున్నారని సన్నిహిత వర్గాలు పేర్కొంటున్నాయి. అలాగే యోగా కార్యక్రమాల్లోనూ పాల్గొంటున్నారట!

ఇక పనిలో పనిగా ఈ 150వ సినిమాకి రచన చేస్తున్న పరచూరి సోదరుల్లో ఒకరైన గోపాలకృష్ణ కూడా చిరుతోనే కేరళలో వుండి.. ఆయనతో కథాచర్చలు జరుపుతున్నారట! చిరు రీఎంట్రీకి తగ్గ కథను సమకూర్చేందుకే ఆయన దగ్గరుండి కథను విశ్లేషిస్తున్నారని సన్నిహితులు చెబుతున్నారు. అంటే.. కేరళ నుంచి తిరిగి రాగానే చిరు కొత్త లుక్’తో కనిపించడంతోపాటు తన 150వ చిత్ర వివరాలను వెల్లడించే అవకాశాలున్నాయని అంటున్నారు.

ఇదిలావుండగా.. చిరు 150వ చిత్రానికి వివి వినాయక్ దర్శకుడిగా ఖరారైనట్లు వార్తలొస్తున్నాయి. అలాగే ఈ చిత్రానికి చిరు తనయుడు రామ్ చరణ్ నిర్మాతగా వ్యవహరిస్తున్న విషయం విదితమే! ఫ్యామిలీ ప్రేక్షకులకు తగినట్లుగా కామెడీ, ఎంటర్టైన్ మెంట్’తోపాటు మెసేజ్ అందించే కథను సమకూరుస్తున్నారని ఇండస్ట్రీ టాక్! అటు.. చిరు తన మూవీ గురించి ఎప్పుడో వెల్లడిస్తారోనని అభిమానులతోపాటు టాలీవుడ్ మొత్తం వెయ్యి కళ్లతో ఎదురుచూస్తోంది.