పవన్ కు రివర్స్ గేర్ లో ఎన్టీఆర్ పయనం..?

Posted: 11/17/2014 01:24 PM IST

Junior ntr allu arjun producer tagor madhu katthi telugu remake movie tollywood news

చిత్రపరిశ్రమలో ప్రస్తుతం పరిణామాలను చూస్తుంటే.. పవన్ కు రివర్స్ గా ఎన్టీఆర్ పయనిస్తున్నారనే వార్తలు వెలువడుతున్నాయి. నిజానికి వీరిద్దరి మధ్య వ్యక్తిగతంగా ఎటువంటి విభేదాలు లేవుగానీ.. చిత్రాలపరంగా మాత్రం అప్పుడప్పుడు పోటీ పడుతూ వుంటుంది. అయితే ఈసారి పవన్ వద్దనుకున్న విషయాలకు వ్యతిరేకంగా ఎన్టీఆర్ నిర్ణయాలు తీసుకుంటున్నారనే వార్త టాలీవుడ్ లో సంచలనంగా మారింది. ఆ విషయం ఏంటనుకుంటున్నారా..? ఆ విషయం తెలియాలంటే మేటర్ లోకి వెళ్లాల్సిందే!

తమిళంలో చాలాకాలంనుంచి సరైన హిట్ లేక కొట్టుమిట్టాడిన హీరో విజయ్, సమంతకు ‘‘కత్తి’’ సినిమా ఆ లోటును తీర్చిసిన విషయం తెలిసిందే! ఈ సినిమా తమిళనాటలో భారీ విజయాన్ని అందుకుని, 100 కోట్ల క్లబ్ లోకి చేరిపోయింది. ఇంతటి భారీ విజయాన్ని అందుకున్న ఈ సినిమాను తెలుగులో కూడా డబ్ చేయాలని భావించి నిర్మాత ఠాగూర్ మధు దీని రైట్స్ తీసుకున్నారు. మొదట్లో ఈ సినిమాను డబ్ చేసి విడుదల చేయాలని అనుకున్నారు గానీ.. స్ట్రెయిట్ గా రీమేక్ చేసి హిట్ కొట్టాలని భావించారు. అందుకే ఈ సినిమాను స్టార్ హీరోతో తెరకెక్కిస్తే ఘనవిజయం సాధిస్తుందనే ఆశతో ఆయన మొదట పవన్ దగ్గరకు వెళ్లారు. అయితే ఆయన ‘కత్తి’ మూవీపై ఆసక్తి చూపించకపోవడంతో తిరిగి తెలుగు డబ్బింగ్ వెర్షన్ రిలీజ్ చేయాలని భావించారు. ఆ నేపథ్యంలోనే ఆయన అన్ని పనులు పూర్తి చేసుకుని నవంబర్ 21వ తేదీన విడుదల చేయాలని ప్లాన్ చేసుకున్నారు. అయితే ఇంతలోనే ఆయన తన నిర్ణయాన్ని మళ్లీ మార్చేసుకున్నారు. చిత్రం విడుదలను ఆపేశారు.

ఎలాగైనా ‘‘కత్తి’’ని తెలుగులో రీమేక్ చేసి భారీ విజయాన్ని అందుకోవాలనే పక్కా నిర్ణయంతో నిర్మాత ఠాగూర్ మధు వున్నారని సమాచారం! అందుకే పవన్ తో కాకపోయిన ఇతర హీరోతో తీయాలని ఆయన ఓ నిర్ణయానికి వచ్చారట! అందులో భాగంగానే జూనియర్ ఎన్టీఆర్, అల్లు అర్జున్ లను సంప్రదించినట్లు వార్తలు వస్తున్నాయి. ఇద్దరిలో ఎవరినైనా ఒకరిని ఒప్పించి, ‘కత్తి’ తెలుగు రీమేక్ ను తెరకెక్కించాలని ఆయన అనుకుంటున్నారట! అయితే గతకొన్నాళ్లనుంచి సరైన హిట్ లేక ఆందోళనలో మునిగిన ఎన్టీఆర్ ఈ రీమేక్ మూవీ మీద ఎక్కువ ఆసక్తి చూపిస్తున్నారని తెలుస్తోంది. ప్రస్తుతం పూరీజగన్నాథ్ దర్శకత్వంలో తెరకెక్కుతున్న చిత్రం షూటింగ్ తో బిజీగా వున్న ఎన్టీఆర్.. ఈనెల 24న గోవాలో చిత్రీకరణ పూర్తయిన అనంతరం హైదరాబాద్ కు తిరిగి రాగానే ‘కత్తి’ చిత్రం చూసి తన నిర్ణయాన్ని వెల్లడించే అవకాశాలున్నాయని చెబుతున్నారు. అయితే ఆ ఇద్దరి హీరోల్లో ఎవరు ‘కత్తి’ రీమేక్ లో నటించనున్నారనే క్లారిటీ ఓ వారం రోజుల్లో వచ్చే అవకాశాలున్నాయి. అంతవరకు వెయిట్ అండ్ సీ!