చిరును చుట్టుముట్టిన ‘గృహదోషం’.. అందుకే ఆలస్యం!

Posted: 11/15/2014 03:57 PM IST

Megastar chiranjeevi house problems 150 movie schedules nepal astrologers

మెగాస్టార్ చిరంజీవికి గతకొన్నాళ్ల నుంచి గృహదోషం పట్టుకుందనే వార్తలు ఇప్పట్లో హాట్ టాపిక్ గా మారిపోయాయి. అందుకే ఆయన ఎటువంటి నిర్ణయాలు తీసుకోకుండా కాస్త సైలెంటుగా వున్నారని సమాచారం! అసలు విషయం ఏమిటంటే.. చిరు తన 150వ చిత్రం విషయంపై ఇంతవరకు ఎలాంటి స్పందన కూడా లేదు. నిజానికి ఆయన తన బర్త్ డే సందర్భంగానే చిత్రం వివరాలతోపాటు దర్శకుడు ఎవరన్న విషయాన్ని బయటపెట్టాల్సి వుండేది. చిరు తన సినిమా వివరాలగురించి వెల్లడిస్తాడని అభిమానులతోపాటు సినీ ప్రేక్షకులు కూడా ఎంతగానో వెయిట్ చేశారు కానీ.. ఆయన మాత్రం ఒక్కమాట కూడా చెప్పకుండా సైలెంట్ గా వుండిపోయారు. ఇక అప్పటినుంచి ఇప్పటివరకు ఆయన తన సినిమా గురించి పెదవే విప్పడం లేదు.

అయితే చిరు తన సినిమా వివరాలు వెల్లడించకపోవడానికి బలమైన కారణముందని.. ఆయనకు గృహదోషం చుట్టుకుందనే వార్తల ప్రచారాలు మొదలయ్యాయి. ఆ ప్రచారాలు ఎలా మొదలయ్యాయంటే.. చిరు తన బర్త్ డే సందర్భంగా నేపాల్ లోని పశుపతి ఆలయంలో ప్రత్యేకంగా పూజలు చేసిన విషయం తెలిసిందే! ఆ సమయంలో చిరు తన 150వ చిత్రానికి మంచి ముహూర్తం పెట్టాలని అక్కడి జ్యోతిష్కులను కోరారట. అయితే అందుకు కొంతకాలం వరకు ఆగాలని.. అక్టోబర్, నవంబర్ మాసాల్లో శివారాధనలో గడపాలని సూచించారట. కార్తీక మాసం అనంతరం సినిమా గురించి ప్రకటన చేయడం మంచిదని వారు సూచించారట. అందుకే.. ఇంతకాలం చిరు తన సినిమా గురించి ఎటువంటి విషయాలను వెల్లడించలేదని సమాచారం! అంతేకాదు.. జ్యోతిష్కులు ఇచ్చిన సలహాల మేరకు ఆయన తన నివాసంలో భారీగా మార్పులు, చేర్పులు చేయించారని విషయాలు కూడా వెల్లడవుతున్నాయి.

ఇన్నాళ్లవరకూ తన సినిమా గురించి ఒక్క విషయం కూడా బయటపెట్టని చిరు.. డిసెంబర్ మొదటివారంలో ఖచ్చితంగా వెలువడిస్తారని వార్తలు వస్తున్నాయి. అప్పటికి ఆయనకు కలిగిన గృహదోషం పూర్తిగా తొలగిపోతుందని.. కార్తీకమాసం కూడా అయిపోతుందని.. ఆ తర్వాత ఆయన 150వ చిత్రం గురించి ప్రకటించడం ఖాయమని అందరూ చెప్పుకుంటున్నారు. అయితే.. ఇంతకీ సినిమా కథను చిరు అసలు ఎంపిక చేసుకున్నారా..? లేదా..? ఎటువంటి కథతో ఆయన తిరిగి వస్తారు..? అసలు ఆ సినిమాకు దర్శకుడు ఎవరు..? అనే విషయాలు మాత్రం ఇంకా తెలియరాలేదు. ఈ ప్రశ్నలన్నింటికీ సమాధానం లభించాలంటే.. స్వయంగా చిరునే పెదవి విప్పాల్సి వుంటుంది.