రుద్రమదేవిపై కామెంట్లు కురిపించిన కాజల్!

Posted: 11/14/2014 09:11 PM IST

Kajal agarwal comments on rudramadevi movie gunasekhar anushka shetty allu arjun facebook

సాధారణంగా చిత్రపరిశ్రమలో వున్న హీరోయిన్లందరూ ఒకరిపై మరొకరు అప్పుడప్పుడు వివాదాస్పద కామెంట్లు సంధించుకోవడంగానీ లేదా పొగడ్తలతో ముంచెత్తడంలాంటివి ఘటనలు చోటు చేసుకుంటూ వుంటాయి. ఆ తరహాలోనే పంజాబీ ముద్దుగుమ్మ కాజల్ అగర్వాల్ కూడా తనదైన శైలిలో ‘బొమ్మాళి’ అనుష్క నటిస్తున్న ‘రుద్రమదేవి’ సినిమాపై కామెంట్లు కురిపించేసింది. అయితే ఇక్కడ ఆమె అనుష్కను, ‘రుద్రమదేవి’ సినిమాను తిట్టడమో లేదా వివాదాస్పద కామెంట్లు సంధించడం లాంటివి చేయలేదులెండి... తన విశాలమైన హృదయంతో ఆ సినిమా గొప్ప విజయం సాధించాలని ఆ మూవీ యూనిట్ సభ్యులకు విషెస్ చెబుతోంది.

ఇటీవలే ‘రుద్రమదేవి’ సినిమా విషయంలో దర్శకుడు గుణశేఖర్ ని ప్రశంసిస్తూ ప్రముఖ దర్శకుడు కృష్ణవంశీ తన విషెస్ తెలిపిన విషయం తెలిసిందే. ఇప్పుడు ఆయన తరహాలోనే కాజల్ అగర్వాల్ కూడా గుణశేఖర్ కి, అనుష్కకు, బన్నీలకు బెస్ట్ విషెస్ తెలుపుతోంది. ‘‘గుణశేఖర్ సార్ గురించి కృష్ణవంశీ సార్ ఎంతో అద్భుతంగా తన భావాలను వెల్లడించారు. నేను కూడా రుద్రమదేవి చిత్రాన్ని ఎప్పుడెప్పుడు చూస్తానా అన్నంత కోరికతో వున్నాను. ఈ సినిమా కచ్చితంగా మన సినీ చరిత్రలో ఓ చిత్రరాజంగా నిలిచిపోతుంది’’ అంటూ ఫేస్ బుక్ ద్వారా తన మనసులోని భావాలను వెల్లడించింది అమ్మడు.

అనుష్క లీడ్ రోల్ దర్శకుడు గుణశేఖర్ ఎంతో ప్రతిష్టాత్మకంగా తెరకెక్కిస్తున్న ‘‘రుద్రమదేవి’’ చారిత్రక కథలో దగ్గుబాటి రానా, అల్లు అర్జున్ లు స్పెషల్ క్యారెక్టర్స్ చేస్తున్న విషయం తెలిసిందే! దాదాపు రెండుసంవత్సరాలపాటు షూటింగ్ జరుపుకుంటున్న ఈ మూవీకి సంబంధించి అనుష్క బర్త్ డే వేడుక సందర్భంగా ఓ మేకింగ్ వీడియో రిలీజ్ అయిన సంగతి తెలిసిందే! ఆ వీడియోను వీక్షించిన వారందరూ ఎంతో బాగుందంటూ ప్రశంసలు కురిపిస్తున్నారు. నిజంగా ఇది భారీ విజయాన్ని అందుకుంటుందని విషెస్ చెబుతున్నారు. ఈ నేపథ్యంలోనే కాజల్ కూడా విషెస్ తెలిపింది. ఈ సినిమాను సంక్రాంతి పండుగ సందర్భంగా రిలీజ్ చేయాలని దర్శకనిర్మాతలు సన్నాహాలు చేస్తున్నారు.