ఆర్నాల్డ్ తో కలిసి పండగచేయనున్న మహేష్!

Posted: 09/09/2014 12:44 PM IST

హాలీవుడ్ ప్రముఖ కథానాయకుడైన ఆర్నాల్డ్ తో కలిసి టాలీవుడ్ ప్రిన్స్ మహేష్ బాబు త్వరలోనే పండగ చేయనున్నాడని లేటెస్ట్ టాక్! అయితే వీరిద్దరూ కలిసి పండగ చేసేది తెరమీద కాదులెండి... సౌత్ ఇండియన్ మోస్ట్ వాంటెడ్ డైరెక్టర్ శంకర్ తాజాగా తెరకెక్కించిన ‘‘ఐ’’ మూవీ ఆడియో ఫంక్షన్ లో! దాదాపు 180 కోట్ల బడ్జెట్ తో నిర్మించిన ఈ చిత్రాన్ని ప్రపంచవ్యాప్తంగా ప్రచారాలు జరుపుతున్న భాగంలోనే ఈ మూవీ నిర్మాతలు ఆర్నాల్డ్ ను ఆడియో విడుదల ఫంక్షన్ కు ముఖ్య అతిథిగా హాజరుకావాల్సిందిగా ఇదివరకే కబురు పంపినట్టు తెలిసిందే! ఆ విషయాన్ని స్వయంగా ఆర్నాల్డ్ కూడా ధృవీకరించాడు.

ఇప్పుడు ఆ ఆడియో వేడకకు మన సౌత్ ఇండియన్ సూపర్ స్టార్స్ లో ఒకడైన మహేష్ బాబు ఆయనతో కలిసి ఆడియో వేదికను షేర్ చేసుకోనున్నాడు. కేవలం ఇతనే కాదు.. సౌత్ సూపర్ హీరో రజనీకాంత్, యూనివర్సల్ స్టార్ కమల్ హాసన్ లు కూడా ఈ వేదిక మీద కనువిందు చేయనున్నారు. ఇటువంటి పెద్ద స్టార్ల మధ్య మన టాలీవుడ్ ప్రిన్స్ కూడా కనిపించడం ఎంతో విశేషం. ఇలా ఇంత మంది సూపర్ స్టార్స్ ని ఒకే చోట చూడటం వారి అభిమానులకు కన్నులపండుగగా ఉంటుంది. ఈ దెబ్బతో మరోసారి ప్రిన్స్ తన ఫాలోయింగ్ ఏంటో మళ్లీ రుజువు చేసి నిరూపించాడంటూ ఆయన అభిమానులు హర్షం వ్యక్తం చేస్తున్నారు.

ఇటీవలే జరిగిన మహేష్ బాబు ‘‘ఆగడు’’ ఆడియో ఫంక్షన్ కి డైరెక్టర్ శంకర్ ముఖ్య అతిథిగా హాజరయిన విషయం తెలిసిందే! ఆ సందర్భంలోనే శంకర్, మహేష్ బాబు తన ‘‘ఐ’’ మూవీ ఆడియోకు రావాల్సిందిగా ఆహ్వానించారని.. మహేష్ బాబు అందుకు వెంటనే గ్రీన్ సిగ్నల్ కూడా ఇచ్చేశారని చెబుతున్నారు. దీపావళి కానుకగా ప్రేక్షకుల ముందుకు రాబోతున్న ఈ ‘‘ఐ’’ (తెలుగులో మనోహరుడు) మూవీలో విక్రమ్, అమీ జాక్సన్ జంటగా నటించగా.. ఏఆర్ రెహమాన్ సంగీతాన్ని అందించాడు. ఈ మూవీ ఆడియో లాంచ్ సెప్టెంబర్ 15వ తేదీన చెన్నైలో భారీ ఎత్తున జరగనుంది.

AS