కోలావరి డి సంగీత దర్శకుడిని చుట్టుకున్న సమస్య

Posted: 01/31/2014 12:21 PM IST

రజనీకాంత్ అల్లుడు ధనుష్ తో కోలావరి డి పాట పాడించి ప్రశంసలు కొట్టేసిన ఆ పాట రచయిత రజనీకాంత్ భార్య మేనల్లుడు అనిరుధ్ రవిచందర్ ఈ సారి రాసిన మరో పాటతో తీవ్ర విమర్శలనెదుర్కుంటున్నాడు. 

ఇంగ్లీషు పదాలతో కలిపి రాసే పాటలలో ఏ పదాన్నైనా ఉపయోగించనుకున్నాడేమో ఇంగ్లీషులో విరివిగా వాడే నాలుగు అక్షరాల ఊతపదంతో పాటు ఇంకా ఎన్నో ఇంగ్లీషు బూతులను తన పాటలో వాడాడు.  అంతేనా, వీడియో తయారు చేసి యుట్యూబ్ లో పెట్టేసాడు.  దానితో ఛీఛీ అంటూ ఛీత్కారేలా కాకుండా చట్టపరంగా సమస్యలను కూడా ఎదుర్కుంటున్నాడు.  ఎస్.జేబాదాస్ పాండియన్ ఆ పాట మీద అశ్లీలంగా ఉందంటూ కోర్టులో పిటిషన్ వేసాడు.

వస్తున్న వ్యతిరేకతల దృష్ట్యా ఆ పాటను అనిరుధ్ యుట్యూబ్ లోంచి తీసెయ్యటమైతే జరిగింది కానీ పిల్ల పోయినా పురిటి వాసన పోనట్లుగా మద్రాస్ హైకోర్టు అతని మీద కేసు నమోదు చెయ్యమని పోలీసులను ఆదేశించింది. 

ఇండియన్ సినిమాటోగ్రాఫ్ చట్టం ప్రకారం ఆ వీడియోని సెన్సార్ బోర్డు ఆమోదానికి ముందుగా పంపించవలసివుంది.  ఆ పని చెయ్యనందుకు అనిరుధ్ న్యాయపరమైన సమస్యలను ఎదుర్కోవలసివస్తోంది.

-శ్రీజ