తెలంగాణ బిల్లు పై అసెంబ్లీలో చర్చ మొదలయ్యిందా

Posted: 12/17/2013 09:58 AM IST

కాంగ్రెస్ అధిష్టానం ఆఘ మేఘాల మీద రాష్ట్ర విభజన అంశానికి సంబంధించిన బిల్లు పై రాష్ట్రపతితో సంతకం చేయించి, రాష్ట్ర అసెంబ్లీకి పంపి 40 రోజుల్లో దీని పై చర్చించి తిరిగి పంపాలని ఆదేశించిన విషయం తెలిసిందే. రాష్ట్రపతి నలభై రోజుల గడువు ఇస్తే రాష్ట్ర వ్యవహారాల ఇంఛార్జి దిగ్విజయ్ సింగ్ నలభై రోజులు కాదు.. వారం పదిరోజుల్లో చర్చించి తిరిగి పంపాలని చెప్పి వెళ్లాడు.

డిగ్గీ రాజా చెప్పాడనో లేక అసెంబ్లీ సమావేశాలు జరుగుతున్నాయి కాబట్టి చర్చిస్తే ఓ పనైపోతుందని అనుకున్నాడో కానీ స్పీకర్ నిన్న (సోమవారం) అసెంబ్లీలో ఎమ్మెల్యేలకు బిల్లు ప్రతులను ఇచ్చి, దాని పై చర్చకు ఇలా ఆదేశించాడో లేదో... అసెంబ్లీలో ఎమ్మెల్యేలు కొట్టుకున్నంత పని చేశారు. కొంత మంది ఎమ్మెల్యేలు ప్రతులను చించివేస్తే, మరికొంత మంది ఎమ్మెల్యేలు కాల్చివేశారు.

దీంతో రగడ తలెత్తి అసెంబ్లీ రణరంగంగా మారింది. ఎమ్మెల్సీ నన్నపనేని రాజకుమారిని కింద పడేశారు, ఇంత జరిగాక అనూహ్యంగా మధ్యాహ్నం సభ తిరిగి ప్రారంభమయ్యింది. సభ ప్రారంభమయిన వెంటనే చర్చకు అనుమతివ్వాలని డిప్యూటీ స్పీకర్‌ని కోరిన శాసనసభా వ్యవహారాల మంత్రి శ్రీధర్‌బాబు, చర్చ ప్రారంభమైనట్లే అని ప్రకటించేశారు. డిప్యూటీ స్పీకర్ చర్చ పై మాట్లాడిల్సిందిగా ప్రతిపక్ష నేతను కోరగా అక్కడ బాబు గారు లేక పోయే సరికి సభను నేటికి వాయిదా వేసి వెళ్లిపోయారు.

మరి బిల్లు పై చర్చ మొదలైందా ? కాలేదా ? అనే అనుమానాలు మాత్రం అలాగే ఉన్నాయి. తెలంగాణ మంత్రులేమో చర్చ ప్రారంభమయ్యిందని ధీమాగా చెబుతున్నారు. సీమాంధ్ర మంత్రులు మాత్రం అబ్బే.. అదేం లేదంటున్నారు. శాసనసబలో చర్చ ప్రారంభం కానట్లేనని న్యాయశాఖ మంత్రి ఎరాసు ప్రతాపరెడ్డి, చిన్న నీటివనరుల శాఖ మంత్రి టిజి వెంకటేష్ అన్నారు. మంత్రి ఆనం రామనారాయణరెడ్డి చర్చ ప్రారంభమైనట్లు కాదని సెలవిచ్చారు.

బీఏసీ సమావేశంలో నిర్ణయం జరగకుండా సభలో ముసాయిదా బిల్లుపై చర్చ ఎలా జరుగుతుందన్నది వారి వాదన. మొత్తమ్మీద బిల్లు పై చర్చ ప్రారంభం అయ్యిందో లేదో అంతా గందరగోళం నెలకొందని అనుకుంటున్నారు.