తొలి టెస్టులో విండీస్ పై భారత్ ఇన్నింగ్స్ విజయం

Posted: 11/08/2013 04:30 PM IST

కోల్ కత్తా ఈడెన్ గార్డెన్ లో వెస్టిండీస్ తో జరగుతున్న తొలి టెస్టు లో భారత్ విండీస్ పై ఇన్నింగ్స్ విజయాన్ని నమోదు చేసుకుంది. మరో రెండు రోజుల ఆట మిగిలి ఉండగానే భారత బౌలర్లు విండీస్ ఆటగాళ్ళ నడ్డి విరిచి భారీ విజయాన్ని అందించారు. టాస్ గెలిచి బ్యాటింగ్ ఎంచుకున్న విండీస్ తొలి ఇన్నింగ్స్ లో 324 పరుగులు చేసి ఆలౌట్ అవ్వగా, తొలి ఇన్నింగ్స్ భారత్ 453 పరుగులు చేసింది.

భారత బ్యాట్స్ మెన్స్ లో రోహిత్ శర్మ 177 పరుగులతో, అశ్విన్ 124 పరుగులతో రాణించి భారత్ కి గౌరవ ప్రదమైన స్కోరును అందించడంతో 219 పరుగుల ఆధిక్యంలోకి దూసుకెళ్లింది. ఆ తరువాత సెకండ్ ఇన్నింగ్స్ ప్రారంభించిన వెస్టిండీస్ సొంత మైదానంలో టెస్టు అరంగ్రేటం చేసిన షమీ ధాటికి 168 పరుగులకే కుప్పకూలి ఇన్నింగ్ 51 పరుగల తేడాతో భారీ పరాజయాన్ని మూటగట్టుకుంది. షమీ రెండో ఇన్నింగ్స్ లో 13.1 ఓవర్లలో 47 పరుగులు మాత్రమే ఇచ్చిన షమీ ఏకంగా 5 వికెట్లు పడగొట్టాడు.

ఈ టెస్టుల్లో షమీ మొత్తం 118 పరుగులిచ్చి  ఏకంగా 9 వికెట్లు నేలకూల్చాడు. అశ్విన్ 3 వికెట్లు తీశాడు. భువనేశ్వర్ కుమార్ ఒక వికెట్ ఇలా ముగ్గురు ఏక ధాటిగా దాడి చేయడంతో వెస్టిండీస్ ఏ దశలో కోలుకోలేక పోయింది. మొదటి ఇన్నింగ్స్ లో రెండో రోజు 354 పరుగులు చేసిన ధోని సేన మూడో రోజు మరో 99 పరుగులు జోడించి 453 పరుగులకు ఆలౌట్ అయింది. నిన్న సెంచరీతో చెలరేగిపోయిన రోహిత్ శర్మ నేడు మరిన్ని పరుగులు జోడించి 177 పరుగుల వ్యక్తిగత స్కోరు వద్ద అవుట్ అయ్యాడు. ఇక నిన్న సెంచరీకి చేరువైన బౌలర్ అశ్విన్ 159 బంతుల్లో 11 ఫోర్లతో 124 పరుగులు చేసి వెనుదిరిగాడు.

ఆ తరువాత వచ్చిన లోయర్ ఆర్డర్ బ్యాట్స్ మెన్స్ ఇలా వచ్చి అలా వెళ్ళిపోయారు. రోహిత్ శర్మకు  మ్యాన్ ఆఫ్ ద మ్యాచ్ అవార్డు దక్కింది. విండీస్ బౌలర్లలో షిల్లాంగ్ ఫోర్డ్ 6 వికెట్లు నేలకూల్చాడు. పెరుమాల్ 2 వికెట్లు దక్కించుకున్నాడు. బెస్ట్, కొట్రీల్ చెరో వికెట్ తీశారు.