ప్రధాని కలుగజేసుకోవాలని కోరుతూ చంద్రబాబు లేఖ

Posted: 08/10/2013 11:20 AM IST

కాంగ్రెస్ పార్టీ కేవలం తన రాజకీయ లబ్ధి మాత్రమే ప్రధానంగా ఎత్తులు వేస్తున్నదని, దానివలన రాష్ట్రంలో సంక్షోభం ఏర్పడిందని, ప్రధాన మంత్రి వెంటనే స్పందించి పరిస్థితులు చెయిజారక ముందే కలుగజేసుకుని సరిదిద్దవలసిందని చంద్రబాబు శుక్రవారం ప్రధాని మన్మోహన్ సింగ్ కి లేఖ రాసారు.

తెలంగాణా రాష్ట్ర ఏర్పాటుకు అనుకూలంగానూ హైద్రాబాద్ దానికి రాజధానిగానూ కాంగ్రెస్ వర్కింగ్ కమిటీ ప్రకటించటంతో సీమీంధ్రలో ఆందోళనలు వెల్లువెత్తి అన్ని రంగాల వారూ రోడ్ల మీదకు వచ్చి తమ అసంతృప్తి ని తెలియజేస్తున్నారని, పరిస్తితి చాలా విషమంగా తయారౌతున్నదని చంద్రబాబు తన లేఖలో పేర్కొన్నారు.

తన ప్రకటనతో ఆందోళనలకు దోహదం చేసి ఉసిగొలిపిన కాంగ్రెస్ పార్టీ నిమ్మకు నీరెత్తినట్టుగా కూర్చుని చోద్యం చూస్తున్నదని చంద్రబాబు తన లేఖలో ఆరోపించారు.  పార్టీ కేవలం తన రాజకీయ ప్రయోజనాలనే దృష్టిలో పెట్టుకుని వ్యవహరిస్తున్నది కనుక రాష్ట్రాన్ని ఈ సంక్షోభం నుంచి బయటపడేయటానికి దేశ ప్రధాన మంత్రిగా కలుగజేసుకుని పరిస్థితులను చక్కదిద్దాలని కోరారు.

ఎనిమిదిన్నర కోట్ల సీమాంధ్రులకు సంబంధించిన నిర్ణయంలో పార్టీలన్నిటినీ సంప్రదించవలసిన అవసరం ఉందికదా ఆ పని జరగలేదు అని చంద్రబాబు అన్నారు.  అందరూ శ్రమించి అభివృద్ధి చేసిన హైద్రాబాద్ ను వదిలిపెట్టటమంటే ఆవేదన చెందటం సీమాంధ్ర ప్రాంతవాసులకు సహజమే కదా అన్నారాయన.  

ఇప్పటికే ఉద్యోగులు, విద్యార్థులు, రైతులు, చేతి పనుల వాళ్ళు, మహిళలు, న్యాయవాదులు, రవాణా మరి ఇతర వర్గాలవారందరూ 11 రోజులుగా పనులను మానుకుని రోడ్ల మీదకు వచ్చి నిరసన తెలుపుతున్నారని, అందువలన దేశ ప్రధానిగా ఈ విషయంలో ఇంకా పరిస్థితులు చేయిజారిపోకముందే జోక్యం చేసుకోవలసిందిగా చంద్రబాబు తన లేఖలో ప్రధానమంత్రిని కోరారు.

 -శ్రీజ