కేసీఆర్‌కు చాక్లెట్‌ తో షాకిచ్చిన రాములమ్మ

Posted: 06/25/2013 01:30 PM IST

తెలంగాణ రాష్ట్ర సమితి అధినేత కె.చంద్రశేఖరరావుపై ఆ పార్టీ ఎంపీ విజయశాంతి ధిక్కార స్వరం వినిపించేట్లుగా కనిపిస్తోంది. మెదక్‌ పార్లమెంట్‌ స్థానం నుండి 2014 ఎన్నికల్లో కేసీఆర్‌ పోటీ చేస్తారని పెద్దఎత్తున ప్రచారం జరుగుతున్న సందర్భంలో మెదక్‌ ఎంపీ సీటు చాక్లెట్‌ కాదని, ఎవరి కోసమో దాన్ని వదులుకునే ప్రసక్తే లేదని ఆమె విస్పష్టంగా ప్రకటించారు. తన సీటు మారుస్తారంటూ వస్తున్న వదంతులపై పార్టీ స్పష్టత ఇవ్వాల్సిన అవసరముందని లేదంటే, అది పార్టీకే నష్టమంటూ ఆమె వ్యాఖ్యానించారు. ప్రస్తుతం ఆమె ప్రాతినిధ్యం వహిస్తున్న మెదక్‌ పార్లమెంట్‌ సీటు కేటాయించకుంటే ఏం చేస్తారన్న ప్రశ్నకు ఆమె మనసులో మాట బయట పెట్టారు. సమయం వచ్చినప్పుడే టిక్కెట్‌ రాకుంటే ఏం చేస్తానో సమాధానం చెబుతానని ఆమె కుండబద్దలు కొట్టారు. మెదక్‌ ప్రజల నుండి తనను ఎవరూ వేరుచేయలేరన్నారు. తన నియోజకవర్గాన్ని మార్చి మరో నియోజకవర్గం నుండి పోటీ చేయాలనే విషయంపై పార్టీ అధ్యక్షుడు కేసీఆర్‌ ఎప్పుడూ తనతో మాట్లాడలేదని ఆమె చెప్పారు.

ప్రజలను దృష్టిలో పెట్టుకుని వారి అభిప్రాయాలకు అనుగుణంగా వ్యవహరించాలే తప్ప తొందరపడి నిర్ణయాలు తీసుకోవద్దంటూ ఆమె కేసీఆర్‌కు సుతిమెత్తగా హెచ్చరించారు. ఆమె మనసులో ఉన్న మరో మాట బయటపడింది. తెరాస తనకు టిక్కెట్‌ కేటాయించకున్నా భారతీయ జనతా పార్టీ తరఫున పోటీ చేసేందుకైనా సిద్ధమని సంకేతమిచ్చారు. ఆ పార్టీ అగ్రనేత ఎల్‌కె అద్వానీ పార్టీలో ఉన్న సమయం లో తనను సొంతబిడ్డలా చూసుకున్నారని అన్నా రు. ఇదిలావుండగా, ప్రస్తుతం పార్టీ అధ్యక్షుడు కె.చంద్రశేఖరరావు మహబూబ్‌నగర్‌ నియోజకవర్గం నుండి ఎంపీగా ఉన్నారు. వచ్చే ఎన్నికల్లో తన సొంత నియోజకవర్గమైన మెదక్‌ నుండి పోటీ చేయాలని దాదాపుగా నిర్ణయానికి వచ్చారు. అయితే విజయశాంతికి మల్కాజ్‌గిరి, సికింద్రాబాద్‌ స్థానాల్లో ఏదో ఒకటి కేటాయించాలని కేసీఆర్‌ భావిస్తున్నట్లుగా ప్రచారం సాగుతోంది. విజయశాంతి తన అభిప్రాయాన్ని స్పష్టం చేయడంతో మెదక్‌ తెరాస ఎంపీ టిక్కెట్‌ విషయంలో గందరగోళం ఏర్పడే పరిస్థితులు కనిపిస్తున్నాయి. విశ్వసనీయ సమాచారం ప్రకారం విజయశాంతి తనకు మెదక్‌ టిక్కెట్‌ కేటాయించకపోతే బిజేపిలో చేరి మెదక్‌ నుండే పోటీ చేయాలని భావిస్తున్నట్లు తెలుస్తోంది. ఈమేరకు బిజేపి నుండి కూడా స్పష్టమైన హామీ లభించినట్లు తెలుస్తోంది.