ప్రజలపై మమత ఆగ్రహం

Posted: 06/18/2013 06:41 PM IST

పశ్చిమబెంగాల్ ముఖ్యమంత్రి తన అసలు మళ్లీ ప్రజలకు చూపించింది. ముఖ్యమంత్రి మమతా బెనర్జీ మరోసారి ప్రజలపై నోరు పారేసుకున్నారు. ప్రభుత్వానికి వ్యతిరేకంగా నినాదాలు చేసినందుకు తీవ్ర వ్యాఖ్యలు చేశారు. బర్ సత్ లోని కామ్దూని గ్రామంలో ఓ విద్యార్థినిపై అత్యాచారం చేసి, హత్యచేసిన విషయం తెలిసిందే. మృతురాలి కుటుంబాన్ని పరామర్శించేందుకు మమతాబెనర్జీ కామ్దూని గ్రామం వెళ్లారు. ప్రజలు ప్రభుత్వానికి వ్యతిరేకంగా నినాదాలు చేశారు. నిందితులపై కఠిన చర్యలు తీసుకోవాలని డిమాండ్ చేశారు. దీంతో ఆగ్రహానికి లోనైన మమత ''మీకు సిగ్గు లేదా..? మీరంతా రాజకీయాలు చేస్తున్నారు. ఈ హత్య చేసింది సిపిఎం కార్యకర్తలే'' అంటూ తీవ్ర వ్యాఖ్యలు చేశారు. విద్యార్థినిపై అత్యాచారం, హత్య ఘటనకు నిరసనగా బెంగాల్ వ్యాప్తంగా ఆందోళనలు వెల్లువెత్తాయి. నిందితులపై కఠిన చర్యలు తీసుకోవాలని డిమాండ్లు ఊపందుకున్నాయి.

పరిస్థితి చేయి దాటిపోవడంతో బాధిత కుటుంబాన్ని పరామర్శించేందుకు నేరుగా మమత ఘటనా స్థలానికి వెళ్లారు. ఆమె రాకపై ఆగ్రహం వ్యక్తం చేసిన స్థానికులు.. 'ఘటన జరిగిన పది రోజుల తరువాత గ్రామం గుర్తుకొచ్చిందా?' అంటూ బెంగాల్ సిఎంపై ఆగ్రహం వ్యక్తం చేశారు. ప్రభుత్వ నిర్లక్ష్యం వల్లే ఈ ఘటన జరిగిందని మండిపడ్డారు. ఈ పరిణామానికి బిత్తరపోయిన మమత.. తన ఆవేశాన్ని సిపిఎంపై వెళ్లగక్కారు. ఈ అత్యాచారం, హత్య చేసింది సిపిఎం కార్యకర్తలేనని తీవ్ర ఆరోపణ చేశారు. 'మీరు కూడా సిపిఎం రాజకీయాలు చేస్తున్నారు. మీకు సిగ్గులేదా..?' అంటూ ప్రజలను తీవ్రంగా దూషించారు.