బంగారు తల్లికి దీవెనల కరువు

Posted: 05/02/2013 10:21 AM IST

Political bangarutalli scheme unilateral decision of cm

ముఖ్యమంత్రి హడావిడిగా ప్రకటించిన బంగారు తల్లి ప్రభుత్వ పథకం మిగిలిన మంత్రుల ఆదరణకు ఇంకా పూర్తిగా నోచుకోలేదు. క్యాబినెట్ లో చర్చించకుండా ప్రకటించిన ఈ పథకం మంచిదో కాదో, పార్టీకి మేలు చేస్తుందో లేదో తరువాత విషయం కానీ అటువంటి ప్రధానమైన పెద్ద తీర్మానాన్ని ముఖ్యమంత్రి ఏకపక్షంగా తీసుకోవటం పార్టీలో కొందరికి నచ్చలేదు.

ముఖ్యంగా ఆరోగ్య శాఖా మంత్రి డి.ఎల్.రవీంద్రరెడ్డి బంగారుతల్లి విషయంలో తనతో ఏమీ చర్చించలేదని, దాన్ని అమలు చేసే విధానాన్ని ఎలా రూపొందించారో క్యాబినెట్ లో తెలియజేయలేదని అన్నారు. 2005 లో కూడా వైయస్ రాజశేఖర రెడ్డి ఇలాగే ప్రతి ఆడపిల్లా లక్షాధికారి అవుతుందని ప్రకటించారు కానీ ఆ పథకం కాస్తా కాగితాల వరకే పరిమితమై కార్యరూపం దాల్చలేదని రవీంద్ర రెడ్డి గుర్తుచేసారు. ఈ పథకం గాని అమలులోకి రాకపోతే కాంగ్రెస్ నాయకుల తాటతీయమని కూడా రవీంద్రరెడ్డి ప్రజలకు సూచించారు.

ఈ విషయంలో పిసిసి అధ్యక్షుడు బొత్సా సత్యనారాయణ కూడా అదేవిధంగా కంగుతిన్నట్టు కనిపించినా ఆయన గుంభనంగా ఉంటూ, ఈ పథకం మీద విమర్శల గురించి ఏమీ మాట్లాడలేను. ముందుగా దాన్ని లోతుగా పరిశీలించనీయండి అన్నారు. అంటే ఆయనకు కూడా పూర్తిగా తెలియదు అన్న విషయాన్ని అలా సున్నితంగా చెప్పారు బొత్సా.

ముఖ్యమైన నిర్ణాయలను క్యాబినెట్ లో ప్రతిపాదించవద్దా అంటూ బంగారు తల్లితో పాటు బయ్యారం గనుల విషయంలో కూడా పంచాయతీ రాజ్ మంత్రి జానారెడ్డి ముఖ్యమంత్రి వైఖరిని తప్పుపట్టారు.

వైయస్ రాజశేఖర రెడ్డి కూడా అంత్య కాలంలో కేంద్రానికి, క్యాబినెట్ కి తెలియకుండా ఉన్నట్టుండి పథకాలను ప్రకటించి విమర్శలకు గురయ్యారు. పార్టీని బలోపేతం చెయ్యవచ్చు, ప్రజలకూ ఉపయోగపడవచ్చు కానీ మాకు చెప్పకుండా మీ అంతట మీరే నిర్ణయాలు తీసుకుంటుంటే ఇక మేమెందుకు అని కొందరు మంత్రులు పైకి అంటున్నారు, మిగిలినవారు లోలోపల కుమిలిపోతున్నారు. వైయస్ ఆర్ హయాంలో మనుషులు తేరుకోకముందే ఎడాపెడా పథాకాలను వాయించి, ప్రభుత్వంలో పగ్గాలను తాన హస్తాలలో గట్టిగా పట్టుకుని, మిగిలిన మంత్రులను మభ్యపెట్టి కొన్నిటిలో సంతకాలు పెట్టించగా వారంతా మాకేం తెలియదని వాపోతూ ఆరోపణలను ఎదుర్కుంటున్నారు. మళ్ళీ కిరణ్ కుమార్ కూడా అదే స్థాయిలో ఏదేదో చేసేసి ప్రజాదరణను, కేంద్రం మద్దతుని సంపాదించి, ఆ బలంతో అదేవిధంగా ఇరికించేస్తారేమోననే భయం కూడా కొందరిలో కనపడుతోంది.

-శ్రీజ