వంట గ్యాస్ రాయితీ పొందటానికి ఆఖరు అవకాశం

Posted: 04/18/2013 10:34 AM IST

ఎల్ పి జి వంట గ్యాస్ మీద రాయితీ పొందేందుకు ఆధార్ నంబర్, బ్యాంక్ ఖాతా నంబర్లను అనుసంధానం చెయ్యటానికి ఆఖరు తేదీని మే 15 గా ప్రకటించటం జరిగింది.  ఫిబ్రవరి 15 నుంచి మూడు సార్లు ఆఖరు తేదీని పొడిగిస్తూ వంట్ గ్యాస్ వినియోగదారులకు అవకాశమిచ్చిన కేంద్ర ప్రభుత్వం ఇక ఇదే ఆఖరు అవకాశమని రాష్ట్ర ప్రభుత్వానికి తెలియజేసింది.  సబ్సిడీ కావాలంటే ఆధార్, బ్యాంక్ ఖాతాలను అనుసంధానం చేస్తూ గ్యాస్ కంపెనీల డేటా బేస్ లోకి ఎక్కవలసిందే. 

మే 15 తర్వాత వంట గ్యాస్ వినియోగదారులకు వారి గ్యాస్ సిలెండర్ల మీద ముట్టవలసిన రాయితీ నేరుగా వారి వారి బ్యాంక్ ఖాతాల్లోకి జమవుతుంది.  సబ్సిడీ రూ.600 కాగా, సిలెండర్ ఖరీదు 1020 రూపాయలు.  సబ్సిడీ తర్వాత 420 రూపాయలవుతోంది. 

ఇంతవరకు అందిన డేటా ప్రకారం, హైద్రాబాద్, రంగారెడ్డి, అనంతపురం, చిత్తూరు, తూర్పు గోదావరి జిల్లాలలోని 50.48 లక్షల వినియోగదారులలో కేవలం 22.15 వినియోగదారుల వివరాలే గ్యాస్ కంపెనీల డేటాలో చోటుచేసుకున్నాయి.  ఈ ఐదు జిల్లాల్లోనూ హైద్రాబాద్, రంగారెడ్డి జిల్లాలు ఈవిషయంలో ఇంకా వెనకబడివున్నాయి. 

డైరెక్ట్ బెనిఫిట్ ట్రాన్స్ ఫర్ (డిబటి) కార్యక్రమంలో ఆధార్ నమోదు విభాగాన్ని పర్యవేక్షిస్తున్న ఆర్ధిక ప్రిన్సిపాల్ సెక్రటరీ డా.పి.వి.రమేష్, నిన్న ఈ విషయాన్ని ప్రకటించారు.  ఆధార్ నంబర్ కోసం అప్లై చేసి ఆధార్ రాని వాళ్ళు మీ సేవ లో వారి ఆధార్ నంబర్ ని పొందవచ్చని, ఆధార్ కోసం ఇంకా అప్లై చెయ్యనివాళ్ళు తక్షణమే ఆ పని చెయ్యటం మంచిదని, ఎందుకంటే ఆధార్ ఎన్ రోల్ మెంటు కూడా మరో నెల మాత్రమే ఉంటుందని చెప్పారు.  4800 కేంద్రాలలో ఆధార్ ఎన్ రోల్ మెంటు జరుగుతున్నదని ఆయన తెలియజేసారు.  ఈ ఐదు జిల్లాల తర్వాత మరో ఎనిమిది జిల్లాలలో ఈ కార్యక్రమాన్ని అమలుపరుస్తామని కూడా ఆయన చెప్పారు. 

-శ్రీజ