Posted: 03/26/2013 05:43 PM IST

పోయిన నెలలో రాహుల్ గాంధీ నిజానికి చాలా స్పష్టంగానే తన మనసులోని మాటను బయటపెట్టారు.  ప్రధానమంత్రి పదవి తనకు ప్రధానం కాదు, పార్టీ అభివృద్ధే ముఖ్యమని అన్నారు.  అలా అన్నంత మాత్రాన రాహుల్ కి ప్రధాని పదవి ఇష్టం లేదని కాదు దాని తాత్పర్యం అంటున్నారు కాంగ్రెస్ పార్టీ జనరల్ సెక్రటరీ దిగ్విజయ్ సింగ్.  పార్టీ పార్లమెంటు సభ్యులు కార్యకర్తలతో రాహుల్ గాంధీ, తను రాజకీయాల్లో సుదీర్ఘంగా పనిచేసి పైకి రావాలనుకున్నట్లుగా వెల్లడించారు.  అంటే ఇప్పుడే అంత పెద్ద బాధ్యత వద్దనే అర్థం వచ్చేట్టుగానే మాట్లాడారు.  కానీ ప్రజలు కోరుకుంటే వద్దంటారా ఆయన అంటారు దిగ్విజయ్ సింగ్.  

ఈ ప్రజలు కోరుకోవటమనే మాటకు అర్థం చెప్పటం చాలా కష్టం.  ప్రజల కోరిక ఎన్నికల తర్వాతనే కదా తెలిసేది.  మరి ముందే ఎలా తెలుసుకుంటారన్నది అర్థం లేని మాట.  

దిగ్విజయ్ సింగ్ తన అభిప్రాయంలో, రాహుల వాళ్ళ అమ్మలాగా పార్టీని నడిపించటం, ప్రధాన మంత్రిగా మరెవరో పనిచెయ్యటం కంటే, రెండు బాధ్యతలనూ ఒకర్ (రాహుల్) ఎత్తుకుంటేనే బావుంటుందన్నారు.  సోనియా గాంధీ ప్రభుత్వ విషయాల్లో కలుగజేసుకోలేదనుకోండి, అయినా రెండు హోదాలు విడివిడిగా ఉండేదానికంటే ఒక్కరే ఆ బాధ్యతలను మోస్తే మంచిదంటారాయన.  

రాహల్ గాంధీ మాటలను మీడియా సరిగ్గా అర్థం చేసుకోలేదని, ప్రధాని పదవి తనకి వద్దని ఆయన ఎప్పుడూ అనలేదని దిగ్విజయ్ స్పష్టం చేసారు.  

రాహుల్ గాంధీ ప్రధాన మంత్రి పదవికి పోటీ చెయ్యరనే మాట చాలామందిలో ఆశలు రేకెత్తించింది.  పార్టీలో ఇప్పటి నుంచే అనవసరమైన పోటీలు, అందులో మళ్ళీ మాటా మాటా అనుకోవడాలు, మనస్పర్థలు, అలకలు, పార్టీలోంచి వెళ్ళిపోతానని బెదిరించటాలు, దానితో పార్టీ బలహీనపడడాలు,  ఇవన్నీ ఎందుకన్న భావన వలన కూడా కాంగ్రెస్ పార్టీ పెద్దలు దిగ్విజయ్ సింగ్ తో ఆ మాటలు అనిపించి ఉండవచ్చు.

-శ్రీజ