Posted: 11/16/2012 11:10 AM IST

యువ నేత రాహుల్ గాంధీకి సారథ్య పగ్గాలు అప్పగించింది! ఆయన నేతృత్వంలో ఎన్నికల సమన్వయ కమిటీని ఏర్పాటు చేసింది! ఆ కమిటీకి అనుబంధంగా మరో మూడు ఉప కమిటీలను నియమించింది. వాటి బాధ్యతలను సీనియర్ నేతలు ఏకే ఆంటోనీ, దిగ్విజయ్‌సింగ్‌లకు అప్పగించింది! తద్వారా, ఎప్పుడైనా ఎన్నికలకు సిద్ధమన్నట్లు సంకేతాలు ఇచ్చింది. పార్టీలో 'పెద్ద బాధ్యతలు' చేపట్టాలని నేతల నుంచి డిమాండ్లు వస్తున్న నేపథ్యంలో, ఇందుకు తాను కూడా రెడీ అని యువనేత రాహుల్‌గాంధీ చేతల్లో చెప్పేశారు. ఈ నేపథ్యంలోనే, కాంగ్రెస్ పార్టీ ఎట్టకేలకు రాహుల్‌కు 'పెద్ద బాధ్యత'ను అప్పగించింది. పార్టీలో ఆయన పరిధిని విస్తృతం చేస్తూ రాహుల్ నేతృత్వంలో ఎన్నికల సమన్వయ కమిటీని నియమించింది. తద్వారా, తదుపరి ఎన్నికల్లో పార్టీ ప్రధాన మంత్రి అభ్యర్థి ఆయనేనని చెప్పకనే చెప్పింది.

రాహుల్ నేతృత్వంలో కమిటీ ఏర్పాటు విషయాన్ని ఏఐసీసీ ప్రధాన కార్యదర్శి జనార్దన్ ద్వివేది ప్రకటించారు. ఏఐసీసీ కార్యాలయంలో ఆయన విలేకరులతో మాట్లాడారు. రాహుల్ నేతృత్వంలో సమన్వయ కమిటీకి అనుబంధంగా మరో మూడు ఉప కమిటీలను ఏర్పాటు చేసినట్లు చెప్పారు. ఎన్నికల ముందు పొత్తులకు సంబంధించి రక్షణ మంత్రి ఏకే ఆంటోనీ నేతృత్వంలో పొత్తుల కమిటీని ఏర్పాటు చేసినట్లు చెప్పారు. పార్టీ మేనిఫెస్టో, ప్రభుత్వ కార్యక్రమాల అమలు కమిటీకి కూడా ఆంటోనీయే నేతృత్వం వహిస్తారని వివరించారు.ఇక, సీనియర్ నేత దిగ్విజయ్ సింగ్‌కు సమాచార, ప్రచార కమిటీ బాధ్యతలను అప్పగించినట్లు తెలిపారు. సూరజ్‌కుండ్‌లో జరిగిన సంవాద్ బైఠక్‌లో ప్రకటించినట్లు.. 2014 సాధారణ ఎన్నికలను దృష్టిలో ఉంచుకుని కాంగ్రెస్ అధినేత్రి సోనియాగాంధీ ఈ నాలుగు కమిటీలనూ ఏర్పాటు చేశారని వివరించారు.