Posted: 11/16/2012 12:25 PM IST

రాష్ట్రంలో  నాయకత్వ మార్పుపై  వస్తున్న వూహాగానాకలు కాంగ్రెస్ అధిష్ఠానం తెరదించింది.  ముఖ్యమంత్రి కిరణ్ కుమార్ రెడ్డి, పీసీసీ అధ్యక్షుడు బొత్స సత్యనారాయణలను మార్చాలన్న ప్రతిపాదన ఏదీ తమ ముందు లేదని కాంగ్రెస్ రాష్ట్ర వ్యవహారాల ఇన్‌చార్జి గులాంనబీ ఆజాద్ స్పష్టం చేశారు. ఢిల్లీలో ఆయన విలేకరులతో మాట్లాడారు. ఆ ఇద్దర్నీ మారుస్తారంటూ రాష్ట్రంలో జరుగుతున్న ప్రచారం వదంతేనని వ్యాఖ్యానించారు. సీఎం కిరణ్‌ను మారిస్తే కాంగ్రెస్‌కు మజ్లిస్ మద్దతు ఉపసంహరించుకోకపోవచ్చునని ఒక విలేకరి ప్రస్తావించగా.. నాయకత్వ మార్పుపై ఆయన స్పష్టత ఇచ్చారు. అసలు ముఖ్యమంత్రిని మార్చే ఆలోచనే లేదన్నారు. ఎంఐఎం అధినేత ఒవైసీతో తాను ఫోన్‌లో మాట్లాడానని, పార్లమెంట్ సమావేశాలకు ఆయన వచ్చినప్పుడు ముఖాముఖి చర్చిస్తానని ఆజాద్ తెలిపారు. సీఎం మతతత్వ వాదిగా వ్యవహరిస్తున్నారంటూ ఒవైసీ చేసిన వ్యాఖ్యల్ని ఖండించారు. కాంగ్రెస్ లౌకిక పార్టీ అని, పార్టీ సీఎంలు ఎవరూ మతతత్వ వాదులుగా వ్యవహరించే అవకాశం లేదని చెప్పారు.

ఈ నేపథ్యంలో రాష్ట్రంలో ఎలాంటి రాజకీయ మార్పులు ఉండవంటూ ఆజాద్ చేసిన వ్యాఖ్యల్లో వాస్తవమెంత అన్న విషయం చర్చనీయాంశమవుతోంది. మరోవైపు సోనియా తనయుడు రాహుల్ గాంధీకి కుడి భుజమైన పార్టీ ప్రధాన కార్యదర్శి దిగ్విజయ్ సింగ్‌కు రాష్ట్ర బాధ్యతలు అప్పగించినట్లు తెలిసింది. కాగా రాష్ట్రంలో పరిస్థితిని అధ్యయనం చేసి వచ్చే వారంలో పార్టీ అధ్యక్షురాలికి దిగ్విజయ్ నివేదిక సమర్పిస్తారని తెలిసింది. ఆ తర్వాతే తెలంగాణ ప్యాకేజీతోపాటు రాజకీయ మార్పులు ఉంటాయని సమాచారం. ఏమైనా రాష్ట్రానికి సంబంధించి తాను తీసుకున్న నిర్ణయాలను అమలు చేసేందుకు కాంగ్రెస్ అధిష్ఠానం కృతనిశ్చయంతో ఉందని, ఒకటి రెండు రోజులు ఆలస్యమైనా మార్పు తప్పదని పరిశీలకులు భావిస్తున్నారు.