Posted: 03/02/2012 05:14 PM IST

మాటకు బ్రాణము సత్యము

కోటకు బ్రాణంబు సుభటకోటి ధరిత్రిన్

బోటికి బ్రాణము మానము

చీటికి బ్రాణంబు వ్రాలు సిద్ధము సుమతీ

మాటకు= చెప్పే మాటలకు, బ్రాణము=జీవం, సత్యము= సత్యం, కోటకు బ్రాణంబు= కోటకి ఆయువుపట్టు, సుభటకోటి- మంచి భటుల సముదాయం, బోటికి బ్రాణము- స్త్రీకి ముఖ్యం, మానము- పవిత్రత, చీటికి బ్రాణంబు= ఉత్తరానికి ముఖ్యం, వ్రాలు= సంతకం.

మాట్లడే మాటలకు సత్యమే జీవం. కోటను రక్షించే భటులే కోటకు ఆధారం. స్త్రీకి మానమే ముఖ్యం. ఉత్తరం చివర చేసే సంతకమే దానికి అధికారికతనిస్తుంది.

సత్యంతో కూడిన మాటలకే విలువుంటుంది. ఆ మాటలే శక్తివంతంగా ఉంటాయి. వారే సత్యసంధులు అనబడతారు. అలా సత్యంతో కూడిన పలుకులను పలికేవారికే వాక్సుద్ధి లభిస్తుంది. వారి మాటలు నిజమౌతాయి. జరిగితీరుతాయి. ఈ విషయాన్ని అర్థమయ్యేట్టుగా చెప్పటానికి మిగిలిన ఉదాహరణలిచ్చారు శతకకర్త.

ఎంత పటిష్టమైన కోట కట్టించినా దాన్ని రక్షించే భటులు లేకపోతే అది నిరుపయోగమే. అధికారులు ఇచ్చే ఆదేశాలకే కాదు, రాసి ప్రకటించే ఏ పత్రానికైనా కింద సంతకం లేకపోతే దానికి విలువే ఉండదు. ఈ ఉదాహరణల ద్వారా మనమాటలకు కూడా విలువుండాలంటే అవి శక్తివంతంగా మారాలంటే సత్యాన్నే పలకాలని శతకకర్త చెప్తున్నారు. మాటకు అంత శక్తి ఉండబట్టే మహాత్ముల దీవెనలు కానీ శాపాలు కానీ పనిచేస్తాయని పూర్వకాలం నుంచీ మనం నమ్ముతూ వస్తున్నాం. అటువంట్ శక్తి వారు ఉచ్ఛరించే మాటలకు ఎలా వచ్చిందంటే వారి సత్యభాషణమే అందుకు కారణం.

-శ్రీజ