Posted: 02/22/2012 12:42 PM IST

నయమున బాలును ద్రావరు

భయమున విషమైనగాని భక్షింతురుగా

నయమెంత దోసకారియొ

భయమే చూపంగవలయు బాగుగ సుమతీ

నయమున- అనునయంగా మంచి మాటలతో, పాలును త్రావరు- పాలు కూడ తాగరు, భయమున- భయపెట్టినట్లయితే, విషమైనగాని- విషపదార్థమైనా, భక్షింతురుగా- తినేస్తారు కదా, నయమెంత- మంచితనం ఎంత, దోసకారియో- చెడ్డదో, భయమే చూపంగవలయు- అందువలన భయాన్నే చూపించాలి, బాగుగ- బాగా.

మంచిగా చెప్తే పాలైనా తాగరు కానీ భయపెడితే విషాన్నైనా గటగటా తాగేస్తారు. అందువలన మంచితనం పనికిరాదు, బాగా భయపెట్టాల్సిందే.

ఇదేదో విప్లవాత్మకమైన మాటలు అనుకోగూడదు. ఈ ఒక్క పద్యాన్నే విడిగా చూసి సుమతీ శతకంలో మంచి పనికి రాదని చెప్పారని అనగూడదు. సమాజంలో మెలిగేవారందరూ మంచితనంతో మెలగాల్సిందే కానీ ఒక వ్యవహారంలో ఉన్నప్పుడు ఎంత కరుకుదనం చూపించాలో అంతా చూపించాలి. అదే వ్యవహార దక్షత.

ఈ సూక్తిని నేర విచారణల్లో బాగా వాడుతారు. మనదేశంలో మరీ. నేరారోపణలో అరెస్టైన వారి మీద ధర్డ్ డిగ్రీ ప్రయోగంతో మొదలుపెట్టి పోలీసులు కేసులను అతివేగంగా పరిష్కరిస్తారు.

-శ్రీజ