Posted: 02/27/2012 04:17 PM IST

పుత్రోత్సాహము తండ్రికి

పుత్రుడు జన్మించినపుడె పుట్టదు, జనులా

పుత్రుని కనుగొని పొగడగ

పుత్రోత్సాహము నాడు పొందుర సుమతీ

పుత్రోత్సాహము- కొడుకు వలన కలిగే ఆనందం, పుత్రుడు జన్మించినపుడె పుట్టదు- కొడుకు పుట్టినప్పుడు కాదు, జనులు- ప్రపంచంలోనివారు, ఆ పుత్రుని కనుగొని- ఆ కొడుకుని చూసి, పొగడగ- అతన్ని పొగుడుతూవుంటే, పుత్రోత్సాహము నాడు పొందుర- కొడుకు వలన ఆనందం ఆరోజు కలుగుతుంది.

కొడుకు పుడితే ఎవరికైనా ఆనందం కలుగుతుంది. కాని తన కొడుకు ఘనతని నలుగురూ పొగిడినప్పుడు ఆ తండ్రి అంతకు ఎన్నో రెట్లు ఆనందాన్ని పొందుతాడు. ఆ కుమారుడు పెరిగి పెద్దై సమాజంలో గొప్పవాడిగా కీర్తించబడేటప్పుడు కలిగే ఆనందఁతో పోల్చి, దానిముందు పుట్టినప్పుడు కలిగే ఆనందం చాలా చిన్నదే కనుక, పుట్టినప్పుడు ఆనందం కలుగదు అని శతకకర్త అన్నారు.

ఈ సుమతీ శతకం నీతిని ప్రబోధించేది కనుక వీటిని నీతి పద్యాలని కూడా అంటారు. తండ్రికి ఎప్పుడు ఎంత ఆనందం కలుగుతుంది అన్నది ఒక సర్వే రిపోర్ట్ కాదిక్కడ. ఇది పిల్లలకు ఇస్తున్న సందేశం. "నాకేం చేసావు, నాకేం పెట్టావు?" అని పిల్లలు పెద్దలని నిలదీసే రోజులివి. అటువంటి రోజులు అప్పటికి రాకపోయినా, సమాజంలో అటువంటి స్థితి రాగూడదనే ఉద్దేశ్యంతోనే, నువ్వు పుట్టటం గొప్పకాదు, నువు పెద్దవాడివై ప్రయోజకుడవై, నలుగురు మెచ్చుకునే నడవడికతో నీ పెద్దలకు ఆనందాన్ని కలిగించాలి సుమా అని శతకకర్త ఈపద్యం ద్వారా పిల్లలకు సూచిస్తున్నారు. సుమతీ శతకాల్లో బహుళ ప్రచారంలో ఉన్న పద్యాల్లో ఇదొకటి.

-శ్రీజ