Posted: 02/15/2012 06:25 PM IST

ధనపతి సఖుడైయుండియు

నెనయంగా శివుడు భిక్ష మెత్తంగ వలసెన్

దనవారి కెంత గలిగిన

దన భాగ్యమె తనకుగాక తథ్యము సుమతీ

ధనపతి= కుబేరుడు, సఖుడైయుండియు= స్నేహితుడైనా కూడా, ఎనయంగా= సంభవించినట్లు శివుడు భిక్షమెత్తగ వలసెన్= భిక్షమెత్తుకోవలసి వచ్చింది, తనవారికెంత కలిగిన= తనవాళ్ళకి ఎంత సంపదున్నా, తన భాగ్యమె తనకుగాక= తనకున్నదే తన అనుభవానికి వస్తుంది, తథ్యము= సత్యము

కుబేరుడు శివుడి చెలికాడే అయినా శివుడు భిక్షాటన చేయవలసివచ్చినట్టుగా, తన భాగ్యమెంతుందో అదే ఎవరికైనా తన అనుభవానికి వస్తుంది కానీ తనవాళ్ళకి ఉన్న సంపదలు వాళ్ళవే కానీ తనవి కావు.

ప్రపంచంలో చాలామందికి ధనవంతులను చూస్తే వారితో చెలిమి చేయాలని, వారికి దగ్గరవాలని ఆశిస్తూ వారికి ఎనలేని గౌరవమివ్వటం కూడా జరుగుతుంది. కానీ వాళ్ళకున్న సంపదలు వాళ్ళవే కానీ నీకందులో వాటా ఏమీ ఉండదని తెలుసుకోమని అంటున్నారు శతకకర్త. ఈ మాట, జోగి జోగి రాసుకుంటే రాలేది బూడిదే అన్న నానుడికి వ్యతిరేకం. సాధువులు ఒంటినిండా బూడిద పూసుకుంటారు. అలాంటి ఇద్దరు సాధువులు పూసుకుని తిరిగితే రాలేదేమిటి బూడిదే కదా అనటంలో అర్థమేమిటంటే, కాస్త డబ్బులున్నవాడితో తిరిగితే ఏమైనా రాలుతుందేమో, నీకేమైనా ఉపయోగిస్తుందేమో అని. కానీ సుమతీ శతకంలో దాన్ని ఖండిస్తున్నారు. ధనవంతుడితో పూసుకుని తిరిగినా సరే ఎవరి భాగ్యంలో ఏముందో అదే కానీ ఇతరులది మీదెప్పుడూ కాదని, అందువలన అటువంటి సమయవ్యర్థం చేసే పనులు చేసేకంటే మీరూ కష్టపడి సంపాదించుకునే ప్రయత్నం చెయ్యండి కానీ ఉన్నవాళ్ళ దగ్గర చేరితే మీకేదో వస్తుందని ఎప్పుడూ అనుకోకండి అని సలహా ఇస్తున్నారు.

-శ్రీజ