Posted: 02/09/2012 04:52 PM IST

చీమలు పెట్టిన పుట్టలు

పాముల కిరవైనయట్లు, పామరుడు దగన్

హేమంబు గూడబెట్టిన

భూమీశుల పాలజేరు భువిలో సుమతీ

చీమలు పెట్టిన పుట్లలు- చీమలు కష్టపడి పుట్టలను తయారుచేసుకుంటే, పాములకు ఇరువైన యట్లు- పాములకు నివాసమైనట్లుగా, పామరుడు- తెలివిలేనివాడు, హేమంబు- బంగారం, కూడబెట్టిన- దాటిపెట్టుకున్నట్లయితే, భూమీశుల- భూమిని పాలించే రాజుల, పాలజేరు- పాలవుతుంది, భువిలో- ఈ ప్రపంచంలో.

ఎంతో కష్టపడి చీమలు పుట్టలు పెడితే అవి కాస్తా పాములకు నివాసాలవుతాయి. పాము పుట్ట అంటారు కానీ వాటిని పాములు తయారుచేసుకోవు అనే ఙానాన్ని కూడా అందిస్తుందీ పద్యం. చీమలే భూమిలి తొలిచి గుల్లగా చేస్తాయి. అప్పుడు పాములు ఆ చీమలనూ తింటాయి, వాటి వలన గుల్లబారిన భూమిని సులభంగా తమ నివాసం చేసుకుంటాయి. అదే విధంగా తెలివిలేనివాడు తినకుండా సంపదను కూడబెడతాడు, దాన్ని కాస్తా అధికారంలో ఉన్న రాజులు ఏదో ఒక మిషతో లాగేసుకుంటారు సుమా అని శతకకర్త హెచ్చరిస్తున్నారు. తను అనుభవించకుండా పక్కకు పెట్టి చివరకు బలవంతుడైన అధికారికి అప్పజెప్పినట్టుగానే వేమన శతకంలో కూడా, తేనెటీగలు కష్టపడి పువ్వుల నుంచి తేనె సంగ్రహించుకుని తెచ్చుకుని తేనెపట్టులో దాచుకుంటే అదంతా దారిన పోయే దానయ్య ఎవరో తీసేసుకుంటారు అని చెప్తారు.

-శ్రీజ