Posted: 02/07/2012 03:29 PM IST

కూరిమిగల దినములలో

నేరము లెన్నందును గలుగనేరవు మరియా

కూరిమి విరసంబైనను

నేరములే తోచుచుండు నిక్కము సుమతీ

కూరిమిగల దినములలో- ఒకరి మీదొకరికి ఇష్టము కలిగవున్నపుడు, నేరములు- తప్పులు, ఎన్నందును- ఏనాడూ, కలుగనేరవు- తోచవు, మరియా కూరిమి- ఆ ఇష్టం కాస్తా, విరసంబైనను- చెడిపోయినపుడు, నేరములే చోచుచుండు- తప్పులే కనపడుతుంటాయి, నిక్కము- ఇది సత్యము.

ఒకరిమీదొకరికి ప్రేమ, ఇష్టం, ఆసక్తి కలిగివున్న సమయంలో ఒకరి తప్పులొకరికి కనపడవు. అదే, ఆ ప్రేమ, ఇష్టం, ఆసక్తి తగ్గిపోయినపుడు ఒకరిలో మరొకరికి తప్పులు తప్పకుండా కనిపిస్తాయి.

మనిషి మీద ఇష్టం ఉన్నప్పుడు అవతలివాళ్ళేం చేసినా బాగానే ఉంటుంది. కానీ ఆ ఇష్టం కాస్తా తగ్గిపోయినట్లయితే అవతలి మనిషిలో అంతకు ముందు ఉన్న లక్షణాలే అయినా అప్పుడు కొత్తగా తప్పులుగానే కనిపిస్తాయి. పక్కింటి పిల్లవాడు చిలకలా మాట్లాడినా నచ్చకపోవచ్చు కానీ తన సొంత కొడుకు ఇంకా మాటలు రాకపోయినా చేసిన ఏ చిన్నపాటి శబ్దమైనా తల్లికి ఎంతో ఆనందాన్ని కలిగిస్తుంది.  ప్రేమ పెళ్ళిళ్ళే కాదు మిగత సంబంధాలు కూడా చాలా వరకు విఫలమవటానికి కారణం ప్రేమలు తగ్గిపోవటమే. ఎంతో ఇష్టపడి ప్రేమించి పెళ్ళి చేసుకున్నవారు కూడా కొన్నాళ్ళు పోయిన తర్వాత ఒకరి నీడనే మరొకరు భరించలేని స్థితికి వస్తున్నారంటే దానికి కారణం సమాజంలో తరిగిపోతున్న ప్రేమాభిమానాలే!

-శ్రీజ