ఎయిర్ అంబులెన్స్ లో ఎయిమ్స్‌కు బిహార్ మాజీ ముఖ్యమంత్రి లాలూ ప్రసాద్

Posted: 07/07/2022 12:44 PM IST

బీహార్ రాష్ట్ర రాజకీయాలతో పాటు జాతీయ రాజకీయాల్లో తనదైన ముద్రవేసిన బిహార్ మాజీ ముఖ్య‌మంత్రి, ఆర్‌జేడీ అధినేత లాలూ ప్రసాద్ యాదవ్ ఆరోగ్య సమస్యలతో అసుపత్రిలో చికిత్స పోందుతున్న విషయం తెలిసిందే. అయితే ఆయనను ఢిల్లీలోని ఎయిమ్స్‌లో వైద్యాధికారులు తరలించారు. ఆరోగ్య స‌మ‌స్య‌ల‌తో పాటు భుజం విర‌గ‌డంతో బాధ ప‌డుతున్న లాలూను మెరుగైన చికిత్స కోసం బుధవారం రాత్రి ఎయిర్‌ అంబులెన్స్‌లో ఢిల్లీలోని ఆల్ ఇండియా ఇన్‌స్టిట్యూట్ ఆఫ్ మెడికల్ సైన్సెస్ (ఎయిమ్స్)కు తరలించారు.

లాలూ ప్ర‌సాద్ ఆదివారం తన నివాసంలో మెట్లపై నుంచి పడిపోవడంతో ఆయ‌న కుడి భుజం ఎముక విరిగింది. దాంతో, కుటుంబ సభ్యులు ఆయనను పాట్నాలోని పరాస్ ఆసుప‌త్రిలో చేర్చించారు. అయితే పరిస్థితి విషమించడంతో మెరుగైన చికిత్స కోసం ఎయిమ్స్‌కు తీసుకెళ్లిన‌ట్టు ఆయ‌న కుమారుడు తేజ‌స్వి యాద‌వ్ తెలిపారు. అవసరమైతే చికిత్స కోసం సింగపూర్ కు తరలిస్తామని కూడ ఆయన చెప్పారు. రాజ్యసభ సభ్యురాలు, ఆయన పెద్ద కుమార్తె మీసా భారతి లాలూతోనే ఉన్నారు. ఆయన భార్య, మాజీ ముఖ్యమంత్రి రబ్రీ దేవి, చిన్న కుమారుడు తేజస్వీ ప్రసాద్ యాదవ్ విమానంలో ఢిల్లీ చేరుకున్నారు.

కాగా, లాలూ ప్రసాద్ యాదవ్ అరోగ్యం విషమించిందని వార్త తెలుసుకున్న బిహార్ ముఖ్యమంత్రి నితీష్ కుమార్.. పరాస్ అసుపత్రికి చేరుకుని లాలూ ప్రసాద్ యాదవ్ ను పరామర్శించారు. ఆయనతో మాట్లాడి వెళ్లిన నితీష్.. ఆయన త్వరగా కోలుకోవాలని ఆకాంక్షించారు. లాలూను అసవరమైతే ఢిల్లీలోని ఎయిమ్స్ అసుపత్రికి కూడా తరలిస్తామని చెప్పారు. ఇక లాలూ చికిత్సకు అయ్యే ఖర్చును రాష్ట్ర ప్రభుత్వం భ‌రిస్తుంద‌ని చెప్పారు. కాగా మెరుగైన చికిత్స కోసం ఆయనను ఎయిర్ అంబులెన్స్ లో ఎయిమ్స్ అసుపత్రికి తరలించారు.