నిరాడంబరంగా పంజాబ్ సీఎం భగవంత్ మాన్-గుర్ ప్రీత్ కౌర్ ల వివాహం

Posted: 07/07/2022 01:34 PM IST

Bhagwant mann s wedding live updates punjab cm ties knot with gurpreet kaur

పంజాబ్ ముఖ్యమంత్రి భగవంత్ మాన్ రెండో వివాహం నిరాడంబరంగా జరిగింది. ఆయన తన కన్నా 16 ఏళ్ల తక్కువ వయస్సున్న యువతిని పెళ్లి చేసుకున్నారు. హర్యానాకు చెందిన 32 ఏళ్ల గుర్ ప్రీత్ కౌర్ తో ఆయన వివాహం ఇవాళ అతిరథమహారధుల మధ్య నిరాడంబరంగా జరిగింది. ఈ పెళ్లికి చండీగఢ్ లోని భగవంత్ మాన్ నివాసం వేదికగా నిలిచింది. పంజాబ్ రాష్ట్రంలోని సంగ్రూర్ జిల్లా, సునామ్ నియోజకవర్గ పరిధిలోని సటోజ్ గ్రామంలో కళ్యాణ వేదిక సిద్దమైంది. కొద్దిమంది కుటుంబ సభ్యులు, బంధుమిత్రుల సమక్షంలో వీరి వివాహం సిక్కు సంప్రదాయాల ప్రకారం జరిగింది.

ఈ పెళ్లికి ఆప్ అధినేత, ఢిల్లీ ముఖ్యమంత్రి అరవింద్ కేజ్రీవాల్ కుటుంబ సమేతంగా హాజరయ్యారు. ఇక ఆప్ రాజ్యసభ సభ్యుడు రాఘవ్ చద్దా కూడా హాజరయ్యారు. అయితే, ఈ పెళ్లికి ఏ ఒక్క పంజాబ్ మంత్రిని, ప్రముఖ నేతలను పిలవలేదని తెలుస్తోంది. అందుకే పెళ్లిలో ఎలాంటి రాజకీయ సందడి కనిపించలేదు. అయితే ఆప్ రాజ్యసభ సభ్యుడు రాఘవ్ చద్ధా మాత్రం పెళ్లిలో తనదైన హడావిడి చేశారు. అందుకనే ఆయన సీఎంతో కలసి పెళ్లికి ముందు ఫోటోలు దిగారు. వాటిని తన సోషల్ మీడియా అకౌంట్లలోనూ పోస్టు చేశారు.

భగవంత్ మాన్ వయసు 48 ఏళ్లు కాగా, ఆయన కంటే గుర్ ప్రీత్ 32 ఏళ్లు.. భర్త కన్నా అమె ఏకంగా 16 ఏళ్లు చిన్నది. 2015లో భగవంత్ మాన్ మొదటి భార్య ఇందర్ ప్రీత్ కౌర్ కు విడాకులు ఇచ్చారు. వీరికి ఇద్దరు సంతానం ఉన్నారు. ఇందర్ ప్రీత్ కౌర్ తన పిల్లలు సీరత్ కౌర్ మాన్ (21), దిల్షాన్ మాన్ (17)లతో కలిసి అమెరికాలో ఉంటున్నారు. ఇక డాక్టర్ గుర్ ప్రీత్ తో సీఎం భగవంత్ మాన్ కు చాన్నాళ్లుగా పరిచయం ఉంది. ఇరు కుటుంబాల మధ్య సాన్నిహిత్యం కూడా ఉంది. గత ఎన్నికల సమయంలోనూ మాన్ కు ఆమె ఎంతగానో సహకారం అందించారు. మొహాలీలో ఆమె వైద్యురాలిగా సేవలు అందిస్తున్నారు.