విపక్షాల ఉమ్మడి రాష్ట్రపతి అభ్యర్థిగా యశ్వంత్ సిన్హా..!

Posted: 06/21/2022 12:41 PM IST

విపక్షాల ఉమ్మడి రాష్ట్రపతి అభ్యర్థిగా సీనియర్ నేత, కేంద్ర మాజీమంత్రి యశ్వంత్ సిన్హా (85) పేరు తెరపైకి వచ్చింది. మాజీ ప్రధాని అటల్ బిహారి వాజ్ పాయ్ నేతృత్వంలోని ఎన్డీఏ ప్రభుత్వంలో ఆర్థికశాఖ మంత్రిగా బాధ్యతలు నిర్వర్తించిన ఆయనను ప్రస్తుతం రాష్ట్రపతి ఎన్నికల్లో ఉమ్మడి విపక్షాల అభ్యర్థిగా నిలపనున్నాయి. రాష్ట్రపతి ఎన్నికలలో అధికార అభ్యర్థికి వ్యతిరేకంగా తాము బరిలోకి దిగలేమని ఎన్సీపీ చీఫ్ శరద్ పవార్, జమ్మూకశ్మీర్ మాజీ ముఖ్యమంత్రి ఫరూక్ అబ్దుల్లా, పశ్చిమ బెంగాల్ మాజీ గవర్నర్, జాతిపిత మహాత్మా గాంధీ మనవడు గోపాల్ కృష్ణ గాంధీ సైతం పోటీలో నిలవబోమని ఇప్పటికే తేల్చి చెప్పారు.

దీంతో అధికారపక్ష అభ్యర్థికి పోటీగా తమ తరపున బలమైన అభ్యర్థిని బరిలోకి దింపాలని కాంగ్రెస్ యశ్వంత్ సిన్హా పేరును తెరపైకి తీసుకువచ్చింది. దీంతో ఇప్పుడు యశ్వంత్ సిన్హా ఉమ్మడి విపక్షాల అభ్యర్థిగా మారారు. ఈ మేరకు ఇవాళ శరద్ పవార్ నేతృత్వంలో ఢిల్లీలో విపక్షాలు భేటీ కానున్నాయి. ఈ సమావేశంలో యశ్వంత్ సిన్హా పేరును ప్రకటించే అవకాశం ఉంది. దేశంలోని విపక్ష పార్టీలన్ని ఒకే తాటిపైకి వచ్చి.. యశ్వంత్ సిన్హాను గెలుపుకు కృషి చేయవల్సిందిగా తాము అన్ని పార్టీలను కోరనున్నామని కాంగ్రెస్ సీనియర్ నేత జైరాం రమేశ్ తెలిపారు. ఈ తరుణంలో తమతో చేతులు కలిపిన తృణముల్ కాంగ్రస్ అధినేత్రి మమతాకు ఆయన ధన్యవాదాలు తెలిపారు.

మాజీ ఐఏఎస్ అయిన యశ్వంత్ సిన్హా 1984లో జనతాదళ్ పార్టీలో చేరారు. ఆ తర్వాత బీజేపీలో చేరిన ఆయన గతేడాది ఆ పార్టీకి రాజీనామా చేసి టీఎంసీ గూటికి చేరారు. ప్రస్తుతం ఆయన టీఎంసీ ఉపాధ్యక్షుడిగా ఉన్నారు.  దివంగత మాజీ ప్రధాని వాజ్‌పేయికి అత్యంత సన్నిహితుడైన సిన్హాకు వివిధ పార్టీల నేతలతో సన్నిహిత సంబంధాలు ఉన్నాయి. ఆయన అభ్యర్థిత్వానికి ఇప్పటికే కొన్ని పార్టీలు మద్దతు పలికాయని, మమతా బెనర్జీ కూడా అందుకు సుముఖంగా ఉన్నారని సమాచారం. బీజేపీని ఎదుర్కొనేందుకు సిన్హా పేరును వ్యూహాత్మకంగానే తెరపైకి తెచ్చినట్టు తెలుస్తోంది.