ITEMVIDEOS: పెళ్లి బ‌రాత్‌కోసం రోడ్డుపై క‌దిలే చలువ పందిరి.. నెటిజ‌న్లు ఫిదా!

Posted: 04/29/2022 06:29 PM IST

Moving pandal wedding baraat s desi jugaad to beat the heat amuses the internet

దేశ‌మంతా ఎండ‌లు మండిపోతున్నాయి. బయటకెళ్తే చాలు భానుడు భగభగలతో ప్రజలు అల్లాడిపోతున్నారు. దీనికి తోడు దేశవ్యాప్తంగా తీవ్ర వ‌డ‌గాలులు వీస్తున్నాయి. కొన్నిచోట్ల 40 డిగ్రీల గ‌రిష్ట ఉష్ణోగ్ర‌త‌లు న‌మోద‌వుతున్నాయి. ఎండ‌వేడిమి నుంచి త‌ప్పించుకునేందుకు జ‌నాలు వివిధ మార్గాల‌ను ఎంచుకుంటున్నారు. ఏదైనా తప్పనిసరి పనిపై బయటకు వెళ్లి.. అరగంట నుంచి గంటలోపు ఇంటికి చేరుకున్నా.. వేడిమి దెబ్బను తట్టుకుని మామూలు స్థితికి చేరుకునేందుకు గంటల సమయం పడుతోంది. ఇక ఇలాంటి భానుడి చండ్రనిప్పుల మధ్య ఊరేగింపులో పాల్గొనాలంటే.. వామ్మో అనాల్సిందే.

కానీ ఢిల్లీలోని ఓ పెళ్లింటివారు మాత్రం భానుడు నిప్పులకొలిమిని కూడా సునాయాసంగా దాటుతూ.. తమ ఇంటి నుంచి పెళ్లి వేడుకకు బాజాభజంత్రీలతో, మేళతాళాలతో బరాత్ నిర్వహించారు. సూర్యుడి నిప్పులు కురిపిస్తున్నా.. అటపాటలతో.. సరదాగా.. ఉత్సాహాం ఎక్కడా తగ్గనీయకుండా నిర్వహించారు. అయితే భానుడి తాపానికి వీరు వేసిన ఓ ఐడియా నెట్టింట్లో వైరల్ గా మారింది. ఈ పెళ్లిబృందం వినూత్న ఐడియా ఇంట‌ర్నెట్ దృష్టిని ఆక‌ర్షించింది. పెళ్లి సమయంలో బరాత్ అవసరం.. కానీ ఎండను తట్టుకునేందుకు వీరు ఏర్పాటు చేసిన చలువ పందిరే ప్రత్యామ్నాయం. అయితే ఈ చలువ పందిరి స్థిరంగా ఓ చోట ఉండేది కాదండోయ్.. ఏకంగా క‌దిలే పందిరి.

ప్రస్తుతం ఈ కదిలే పందిరి వీడియో నెట్టింట్లో విపరీతంగా వైరల్ అవుతోంది. నెటిజనులు ఈ విధమైన కదిలే చలువ పందిని చూసి వాహ్ వస్తాద్ అని కామెంట్లు పెడుతున్నారు. ఈ వీడియోను రిటైర్డ్ ఎయిర్ మార్ష‌ల్ అనిల్ చోప్రా ట్విట‌ల‌ర్‌లో షేర్ చేశారు. ఈ వీడియోలో వ‌రుడు గుర్రంపై ఉండ‌గా, బంధువులు క‌దిలే పందిరికింద నృత్యాలు చేస్తూ ఎంజాయ్ చేస్తున్నారు. వారికి ఎండ త‌గ‌ల‌కుండా ఆ పందిరిని నాలుగుమూల‌లా న‌లుగురు ముందుకు జ‌రుపుతూ క‌దులుతున్నారు. ఈ వీడియో చూసిన‌వారంతా ఆశ్చ‌ర్య‌పోయారు. ఇండియ‌న్స్ అంటేనే క్రియేటివిటీకి మారుపేర‌ని నెటిజ‌న్లు కామెంట్ చేశారు.