ఏప్రిల్ 30 వరకు లాక్ డౌన్ కొనసాగిస్తున్న తొలి రాష్ట్రం

Posted: 04/09/2020 12:51 PM IST

Naveen patnaik government extends lockdown in odisha till april 30

ప్రపంచవ్యాప్తంగా తన ప్రభావాన్ని చాటుతూ వేలాది మందిని పోట్టనబెట్టుకున్న కరోనా వైరస్ దేశంలోకి ప్రవేశించడంతో అప్రమత్తమైన కేంద్ర, రాష్ట్రప్రభుత్వాలు.. ముందస్తు నియంత్రణ చర్యల్లో భాగంగా లాక్ డౌన్ విధించాయి. అయితే మార్చి 24 నుంచి అమల్లోకి వచ్చిన లాక్ డౌన్ ఈ నెల 14తో ముగియనుంది, అయితే ఢిల్లీ హజ్రత్ నిజాముద్దీన్ ఘటనతో దేశవ్యాప్తంగా కరోనా కలకలం రేగుతూ శరవేగంగా వ్యాప్తి చెందుతుండడంతో లాక్ డౌన్ పోడగించాలన్న డిమాండ్లు పెరుగుతున్నాయి. ఇప్పటికే పలు రాష్ట్రాలు ప్రధాన మంత్రికి ఈ మేరకు విన్నవించాయి,

ఈ నేపథ్యంలో లాక్ డౌన్‌ కొనసాగింపుపై కేంద్రప్రభుత్వం ఎలాంటి నిర్ణయం తీసుకోనుంది అనే విషయంపై సర్వత్రా ఉత్కంఠ నెలకొంది. అయితే లాక్ డౌన్ ఎత్తివేసే సూచనలు కనిపించడం లేదన్న సంకేతాలను ఇప్పటికే వెలువరించిన కేంద్రం.. అటు అఖిల సక్ష సమావేశంలోనూ ఈ విషయమై చర్చించింది. ఇక 11వ తేదీన జరగే ముఖ్యమంత్రుల సమావేశంలో ఈ మేరకు కేంద్రం నిర్ణయం వెలువరించనున్నట్లు కూడా వార్తలు వస్తున్నాయి. కాగా కేంద్రం నిర్ణయాన్ని అటుంచితే లాక్ డౌన్ నేపథ్యంలో ఒడిశా ప్రభుత్వం కీలక నిర్ణయం తీసుకుంది.

కొవిడ్‌-19ను కట్టడి చేసేందుకు లాక్‌డౌన్‌ను కొనసాగించాలని నిర్ణయించింది. ఈ విషయాన్ని ఆ రాష్ట్ర ముఖ్యమంత్రి నవీన్‌ పట్నాయక్‌ ఓ ప్రకటన ద్వారా తెలిపారు. ప్రజల ప్రాణాలు.. ఆర్థిక స్థిరత్వం కంటే ముఖ్యమైనవని ఈ సందర్భంగా ఆయన వ్యాఖ్యానించారు. ఈ నెలాఖరు వరకు లాక్‌డౌన్‌ పొడిగించాల్సిందిగా కేంద్రప్రభుత్వాన్ని కూడా కోరినట్టు నవీన్‌ పట్నాయక్‌ తెలిపారు. ఒడిశాలో విద్యా సంస్థలకు జూన్‌ 17 వరకు సెలవులు ప్రకటించారు. దేశంలోని అన్ని రాష్ట్రాల కంటే ముందుగా లాక్‌డౌన్‌ కొనసాగింపు నిర్ణయాన్ని ఒడిశా ప్రభుత్వం తీసుకోవడం గమనార్హం.