కత్తి మహేష్ పై నగర బహిష్కరణ వేటు

Posted: 07/09/2018 10:58 AM IST

సినీ విమర్శకుడు, ఒకే ఒక చిత్రం దర్శకుడిగా (ప్లాప్ మూవీ) తెలుగు ప్రజలకు పరిచితుడైన కత్తి మహేష్ పై హైదరాబాద్ పోలీసులు కన్నెర్ర చేశారు. అతనిపై ఏకంగా నగర బహిష్కరణ విధించారు. సాధారణంగా రౌడీషీటర్లకు మాత్రమే విధించే ఈ శిక్ష వారి తరహాలోనే నగరంలో శాంతిభద్రతలకు విఘాతం కలిగిస్తున్నాడన్న భావనతో పోలీసులు కత్తి మహేష్ పై వేటు వేశారు. అనుమతి లేకుండా నగరంలోకి రాకూడదని కూడా అంక్షలు విధించారు. వివాదాస్పద వ్యాఖ్యలు చేస్తూ నగరంలోని లా అండ్ అర్డర్ కు సమస్యగా మారుతున్న క్రమంలో అతనిపై పోలీసు హైదరాబాద్ కమీషనరేట్ పోలీసులు ఈ మేరకు చర్యలకు పూనుకున్నారు.

సినీవిమర్శకుడిగా కొందరికే తెలిసిన కత్తి మహేష్ బిగ్ బాస్ షో ( తెలుగులో తొలి సీజన్) లో కనిపించడంతో సెలబ్రిటీగా మారిపోయాడు. అక్కడి నుంచి అతనికి క్రేజ్ కూడా పెరిగిపోయింది. దీంతో బిగ్ బాస్ షో నుంచి ఆయన బయటకు వచ్చిన తరువాత సినీ విమర్శకుడు కాస్తా.. రాజకీయ విమర్శకుడిగా మారిపోయాడు. అంతటితో అగకుండా.. కేవలం కొందరు హీరోలను మాత్రమే టార్గట్ చేస్తూ.. కొత్తగా వచ్చిన పార్టీనే విమర్శల పాలు చేసేందుకు పూర్తిగా ప్రయత్నించాడు.

సుదీర్ఘ అనుభవం వున్న రాష్ట్రంలోని ప్రాంతీయ రాజకీయ పార్టీకి తొత్తుగా మారి చౌకబారు విమర్శలు చేస్తున్నాడని కూడా విమర్శలు వచ్చాయి. ఈ క్రమంలో ఓ టీవీ ఛానెల్ లో అతడు ఓ వర్గం నేతలు అరాధ్యంగా పూజించే దేవుడిపై అనుచిత వ్యాఖ్యలు చేశాడు. శ్రీరాముడు తన దృష్టిలో దేవుడు కాదని టీవీ టిబేల్ లో వ్యాఖ్యలు చేశాడు. దీంతో ఆ వర్గానికి చెందిన స్వామీజీకి ఇవాళ ధర్మాగ్రహ యాత్రకు పిలుపునిచ్చిన నేపథ్యంలో కత్తిమహేష్ పై పోలీసులు నగర బహిష్కరణ వేటు వేశారు.