పోలీసుగా అదృశ్యం.. టెరరిస్టుగా ప్రత్యక్ష్యం.

Posted: 10/28/2017 03:31 PM IST

J k police personnel joins let terrorist outfit while on leave

జమ్మూకాశ్మీర్ లోని పాకిస్తాన్ బోర్డర్ లో విధులు నిర్వహిస్తున్నాడు ఓ పోలీస్ అధికారి. అతని పేరు ఇష్ఫాక్ అహ్మద్. 2012 నుంచి పోలీస్ విభాగంలో పని చేస్తున్నాడు. సమర్ధుడైన అధికారిగా పేరు పొందాడు. బోర్డర్ లోని విధులు నిర్వహించే పోలీసులకే ట్రైనింగ్ ఇచ్చే స్థాయికి ఎదిగాడు. మూడు నెలల క్రితం సెలవుపై వెళ్లాడు. రెండు నెలల తర్వాత అక్టోబర్ 23వ తేదీన విధుల్లో చేరాల్సి ఉన్నా.. అడ్రస్ లేదు. ఇంటికి సమాచారం ఇస్తే స్పందన లేదు.

అనూహ్యంగా వారం రోజుల క్రితం ఏకే 47 తుపాకీతో సోషల్ మీడియాలో ప్రత్యక్షం అయ్యాడు అహ్మద్. పోలీస్ జమ్మూకాశ్మీర్ పోలీస్ విభాగం మొత్తం షాక్ అయ్యింది. అహ్మద్ దగ్గర AK47 తుపాకీ ఉండటంతో అతను టెర్రరిస్ట్ గ్రూప్ లో చేరినట్లు అనుమానిస్తున్నారు పోలీసులు. లేదంటే ఎవరైనా కిడ్నాప్ చేశారా అనే దానిపై ఆరా తీస్తున్నారు. కిడ్నాప్ అయినట్లు కుటుంబ సభ్యులు, బంధువుల నుంచి కంప్లయింట్ లేకపోవటంతో.. స్వయంగానే తీవ్రవాదులతో కలిసినట్లు భావిస్తున్నారు. దీనిపై అత్యున్నత స్థాయిలో విచారణ చేపట్టారు ఉన్నతాధికారులు.

కతువా జిల్లాలోని పోలీస్ ట్రైనింగ్ సెంటర్ లో విధులు నిర్వహించే ఉద్యోగి కావటంతో.. కీలక సమాచారం టెర్రరిస్టులకు చేరే అవకాశం ఉందని ఆందోళన చెందుతున్నారు పోలీసులు. అహ్మద్ ది షోపియాన్ ప్రాంతంలోని హెఫ్ షిర్మల్ గ్రామం. అతడిని పట్టుకోవటానికి ప్రత్యేక బృందాలను నియమించినట్లు తెలిపారు సీనియర్ పోలీస్ అధికాది. ఆందోళనకరమైన అంశం ఏంటంటే.. ఇటీవల కాలంలో ఎనిమిది మంది పోలీసులు ఉద్యోగాలు వదిలేసి.. కాశ్మీర్ మిలిటెంట్లలో చేరటం చర్చనీయాంశంగా మారింది.