ఉండవల్లి అరెస్ట్.. సవాలు విసిరి వెనక్కు తగ్గిన సర్కార్

Posted: 07/18/2017 01:56 PM IST

మాజీ పార్లమెంటు సభ్యుడు ఉండవల్లి అరుణ్ కుమార్ ను పోలీసులు అరెస్టు చేశారు. పోలవరం, పట్టిసీమ ప్రాజెక్టులలో జరిగిన అవినీతి విషయమై టీడీపీ నేత విసిరిన సవాలును స్వీకరించిన విజయవాడ చేరుకున్న ఆయనను పోలీసులు అడ్డుకుని అరెస్టు చేశారు. రాష్ట్ర పునర్విభజన బిల్లులో అప్పుడు కేంద్రంలో వున్న యూపీఏ ప్రభుత్వం పోలవరం ప్రాజెక్టుకు జాతీయ హోదా అంశాన్ని పోందుపర్చినా.. నాలుగేళ్లు కావస్తున్నా ఇంకా పనులు మాత్రం ఎక్కడ వేసిన గొంగలి అక్కడే అన్నట్లుగా సాగుతున్నాయన్న విమర్శలు చేశారు. ఈ ప్రాజెక్టుల్లో అవినీతి, అక్రమాలు జరిగాయని అరోపించారు.

ఈ నేపథ్యంలో అవినీతి ఎక్కడ జరిగిందన్న విషయమై టీడీపీ సీనియర్ నేత గోరంట్ల బుచ్చయ్య చౌదరి ఉండవల్లికి సవాల్ విసిరారు. అరోపణలు చేయడం కాదు వాటిని నిరూపించాలని.. అప్పుడే అరోపణలకు విలువ వుంటుందని.. ఉరికే విమర్శిస్తే సరిపోదని అన్నారు. పోలవరం, పట్టిసీమ ప్రాజెక్టుల్లో జరిగిన అవినీతిపై బహిరంగ చర్చ సిద్దమా అని సవాల్ విసిరారు. దీంతో సవాలును స్వీకరించిన ఉండవల్లి అరుణ్ కుమార్.. తాను చర్చకు సిద్దమని ప్రకటించి.. ఇవాళ విజయవాడ వెళ్తుండగా అయనను పోలీసులు అరెస్టు చేశారు.  చర్చా వేదికగా పేర్కోన్న ప్రకాశం బ్యారేజీకి కాకుండా పోలీసులు తనను బందరు రోడ్డులోకి తీసుకెళ్తున్నారని చెప్పారు.

ప్రకాశం బ్యారేజీపై తలపెట్టిన చర్చను కూడా పోలీసులు అడ్డుకున్నారు. బ్యారేజీపై చర్చకు అనుమతించాలని గోరంట్ల లిఖితపూర్వకంగా పోలీసులను కోరగా, అందుకు అనుమతించే ప్రసక్తే లేదని ఆయనకు ఫ్యాక్స్ ద్వారా  సమాచారాన్ని పంపించిన పోలీసులు, ఈ ఉదయం బ్యారేజీ వద్దకు బయలుదేరిన బుచ్చయ్య చౌదరిని కూడా అడ్డుకున్నారు. ఇరువురు నేతల సవాళ్లు, ప్రతిసవాళ్ల నేపథ్యంలో ప్రకాశం బ్యారేజ్ వద్ద పోలీసులను భారీగా మోహరించి, అక్కడికి ఎవరూ చేరకుండా చూస్తున్నారు. ఈ ఘటనతో సమీప ప్రాంతాల్లో ట్రాఫిక్ కు తీవ్ర అంతరాయం ఏర్పడింది.

కాగా ఈ సందర్బంగా మీడియాతో మాట్లాడిన బుచ్చయ్య చౌదరి పట్టిసీమ ప్రాజెక్టుపై అనవసర రాజకీయాల చేస్తున్నారని విమర్శించారు. రాష్ట్రంలో ప్రాజెక్టులు నిర్మాణం జరగకూడదని విపక్షాల దురుద్దేశ్యంగా వుందని మండిపడ్డారు. జఇప్పటికే గోదావరి డెల్టాను కూడా అడ్డుకున్నారని.. ఇక పోలవరంపైకి వారి గురి మళ్లిందని అన్నారు. పోలవరం ప్రాజెక్టును రాష్ట్ర ప్రభుత్వం ఎంతో ప్రతిష్టాత్మకంగా తీసుకుని నిర్మాణం పనులు చేపడుతుందని అన్నారు.

రాత్రికి రాత్రే ప్రాజెక్టుల నిర్మాణాలు జరగవని, అందుకు కొంత సమయం పడుతుందని చెప్పిన బచ్చయ్య చౌదరి.. అప్పటి వరకు రైతులకు నీరు అందించేందుకు వీలుగా పట్టిసీమ ప్రాజెక్టును నిర్మించినట్టు చెప్పుపకొచ్చారు. ఇక ఉండవల్లి అరుణ్ కుమార్.. అసలు రైతే కాదని, ఆయనకు పట్టిసీమ, పోలవరం ప్రాజెక్టుల గురించి ఎందుకని బుచ్చయ్య చౌదరి అగ్రహం వ్యక్తం చేశారు. అయితే ఓ వైపు చర్చకు కాలుదువ్వి.. ప్రభుత్వమే పోలీసులతో చర్చకు అనుమతినివ్వమని చెప్పించి వెనక్కు తగ్గిందన్న విమర్శలు కూడా వినిపిస్తున్నాయి.