బంజారాహిల్స్ లో మిట్టమధ్యాహ్నం యువకుడి హత్య

Posted: 07/08/2017 04:46 PM IST

హైద‌రాబాద్ న‌గ‌రంలో దారుణ హత్య జరిగింది. మిట్టమధ్యాహ్నం అందరూ చూస్తుండగా ఓ యువకుడ్ని అతికిరాతంగా హత్యచేశారు. బంజారా హిల్స్ రోడ్ నంబరు 7లో ఈ ఘటన చోటుచేసుకోవడం స్థానికులను భయాందోళనకు గురిచేసింది. ద్విచక్ర వాహనంపై వెళుతున్న అత‌డిని వెంబడించిన దుండగులు అత్యంత పాశవికంగా అతడ్ని కత్తులతో పోడిచి చంపారు. దీంతో యువకుడు అక్కడికక్కడే ప్రాణాలు కోల్పోయాడు. మృతుడి వివరాలు ఇంకా తెలియాల్సి ఉంది. పాత కక్ష‌లే ఈ హత్యకు కారణమని పోలీసులు అనుమానిస్తున్నారు.

ముందస్తుగా వేసుకున్న ప్రణాళికలో భాగంగా ఓ సెంటిల్ మెంట్ విషయమై అతడ్ని పరిచయస్తులతో బంజారాహిల్స్ కు రప్పించి.. దుండ‌గులు ఈ దారుణానికి పాల్ప‌డిన‌ట్లు స‌మాచారం. ఈ ఘ‌ట‌నాస్థ‌లికి చేరుకున్న పోలీసులు కేసు న‌మోదు చేసుకుని, హత్యకు గల కారణాలపై ఆరా తీస్తున్నారు. నిందితుల‌ కోసం గాలింపు చ‌ర్య‌లును ప్రారంభించారు. యువకుడిని కత్తితో పొడిచిన దుండగుడు పోలీసుస్టేషన్ లో లొంగిపోయినట్లు సమాచారం. అయితే ఈ విషయమై పోలీసులు మాత్రం సమాధానం దాటవేస్తున్నారు.