మాల్యాపై విరుచుకుపడిన నెట్ జనులు.. పేలిన జోకులు

Posted: 04/18/2017 11:10 PM IST

వ్యాపార‌వేత్త, లిక్కర్ డాన్ గా పేరొందిన నాటి కింగ్ ఫిఫర్ అధినేత విజ‌య్ మాల్యా అరెస్టు కావడం.. ఆ తరువాత బెయిల్ రావడంలో కేవలం మూడు గంటల సమయం మాత్రమే పట్టింది. అయితే ఆ సమయమే చాలు అనుకున్నట్లు వున్నారు నెట్ జనులు. ఆయన అరెస్టు నేపథ్యంలో ఎవరికి తోచిన అలోచనలను వారు సోషల్ మీడియాలో పెట్టారు. మాల్యా అరెస్టు అయిన మూడు గంటల వ్యవధిలోనే సోషల్ మీడియాలో ట్రెండింగ్ అయిన వ్యక్తిగా నిలిచాడు. ఇందుకు కారణం  ఆయన అరెస్టుపై సోష‌ల్ మీడియాలో పేలిన జోకులే.

ట్విట్టర్‌లో భారత్ వ్యాప్తంగానే కాకుండా ప్రపంచవ్యాప్తంగా చూస్తే ఇది టాప్ ఫైవ్ ట్రెండింగ్ టాపిక్‌గా నిలిచింది. మాల్యాపై జోకులు పేల్చుతూ నెటిజ‌న్లు త‌మ ప్ర‌తిభనంతా చూపించారు. విజ‌య్ మాల్యా గ‌త ఏడాది మార్చి 2న (సరిగ్గా ఐపీఎల్ సీజన్‌ ప్రారంభం కావడానికి ముందు) లండన్ పారిపోగా, మళ్లీ ఇప్పుడు ఐపీఎల్ సీజన్ ప్రారంభం కావడంతో ఆ మ్యాచ్‌లు చూసేందుకే మాల్యా వ‌స్తున్నాడ‌ని కొంద‌రు వ్యంగంగా పోస్టులు చేస్తున్నారు. వాటి కోసమే తనకు తానుగా అయన అరెస్టు అయ్యాడని కూడా జోకులు పేలుతున్నాయి. మాల్యా మీద విపరీతంగా సెటైర్లు వేశారు. ఆయనను ఓ ఐటమ్ గా చేసేశారు నెట్ జనులు.

ఒక‌ప్పుడు రాయల్ చాలెంజర్స్ జట్టు యాజమానిగా వున్న మాల్యా అరెస్టు కాగానే ఆర్సీబీ జట్టు పెర్ఫార్మెన్సు ఇక్కడే కాదు, లండన్‌లో కూడా బాగోలేదని కొంద‌రు సెటైర్లు వేస్తున్నారు.  మద్యం తాగే బారు నుంచి జైలు గోడల గేట్లకు వుండే బార్ల (ఊచలు) వెనక్కి వెళ్తున్నాడని ఇలా ఎవరికీ తోచిన విధంగా వారు సెటైర్లు వేశారు. ఇక దర్శకుడు శిరీష్ కుందర్ త‌మ ట్విట్ట‌ర్ ఖాతా ద్వారా ఇదే అంశంపై స్పందిస్తూ...  'బ్యాంక్ చోర్' సినిమా ప్రమోషన్ కోసమే విజ‌య్ మాల్యాను లండ‌న్‌ నుంచి తీసుకొస్తున్నార‌ని పేర్కొన్నాడు. ఇలా ఒక‌టి, రెండు కాదు.. మాల్యాపై సెటైర్ వేయ‌డానికి ప్ర‌పంచంలోని అన్ని అంశాల‌ను వాడేసుకుంటున్నారు నెట్ జనులు.