72 గంటల్లో కేసును ఛేదించిన పోలీసులు.. సెలబ్రిటీ కదా మరీ..

Posted: 03/26/2016 06:57 AM IST

మన పోలీసులు పనితీరు ప్రస్తుత కాలంలో ప్రశంసించదగినదే. అయితే అప్పుడప్పుడే మాత్రం వారు అసలు కన్నా కొసరుకే అధిక ప్రాధాన్యత ఇస్తున్నారన్న విమర్శలు వినబడుతున్న తరుణంలో ఈ ఘటన వారిని మరోమారు వార్తల్లో నిలిచేలా చేసింది, కొండను తవ్వి ఎలుకను పట్టిన చందంగా మన పోలీసులు పనితీరుపై ఈ కేసులో విమర్శలు వెల్లువెత్తుతున్నాయి. తన వస్తువు దొంగలించబడిందని ఓ సెలబ్రిటీ పిర్యాదు ఇవ్వడంతో.. ఆ కేసు దర్యాప్తు కోసం నలుగురు క్రైం టీమ్ కానిస్టేబుళ్లతో ఒక బృందాన్ని ఏర్పాటు చేయింది మరీ పంపారు. ఒక్కటి, రెండు, మూడు అని లెక్కబెట్టకుండానే కేవలం 72 గంటల వ్యవధిలో కేసును చేధించారు పోలీసులు. అయితే ప్రశంసించాలి తప్ప వ్యంగాస్త్రాలు ఎందకంటారా..?

వివరాల్లోకి వెళ్తే.. దిల్‌షుక్‌నగర్‌లో నివసించే జగదీష్ అనే వ్యక్తి ఆక్యుపంక్షర్ థెరపిస్టుగా పనిచేస్తున్నాడు. రెండు వారాల క్రితం ఫిలింనగర్‌లో నివసించే సినీ నటి రాధా ప్రశాంతికి పరిచయం అయ్యాడు. ఈ నేపథ్యంలో వారం రోజుల నుంచి జగదీష్ ఆమెతో ఫోన్‌లో అందుబాటులో లేకుండా పోయాడు. అయితే తన ఇంట్లో పెన్‌డ్రైవ్ చోరీకి గురైందని అది జగదీష్ చోరీ చేశాడంటూ ఆమె మూడు రోజుల క్రితం బంజారాహిల్స్ పోలీస్ స్టేషన్‌లో ఫిర్యాదు చేసింది. కేసు నమోదు చేసిన పోలీసులు జగదీష్ కోసం గాలింపు చేపట్టారు.

అధికారుల అదేశాలతో మూడు రోజులు అతని ఇంటి వద్ద మాటువేసిన పోలీసులు.. రేయింబవళ్లు అతడి కోసం వెతికేందుకు పోలీసు బృందాన్ని ఏర్పాటు చేశారు. తీరా జగదీష్‌ను విచారిస్తే ఆ పెన్‌డ్రైవ్ తాను తీయలేదని తెలిపాడు. పెన్‌డ్రైవ్ పోయిందని సినీనటి ఇచ్చిన ఫిర్యాదు మీద పోలీసులు చేసి హడావుడికి అవాక్కయ్యారు. ఇటీవల బంజారాహిల్స్ పోలీస్ స్టేషన్ పరిధిలో అయిదు ఖరీదైన కార్లు చోరీకి గురయ్యాయి. ఇందులో ఫార్చునర్‌లాంటి ఖరీదైన కారు కూడా ఉంది. వీటి కోసం గాలించాల్సిన పోలీసులు ఓ పెన్‌డ్రైవ్ దొంగ కోసం మూడు రోజులుగా వేట సాగించారని తెలిసి.. జనం ముక్కున వేలేసుకున్నారు.

మనోహర్