దేశ రాజధానిలో మరో నిర్భయ ఘటన.. మైనర్ బాలికపై పక్షం రోజులుగా అత్యాచారం...

Posted: 12/08/2015 06:00 PM IST

Minor girl abducted and gang raped in delhi

దేశరాజధాని ఢిల్లీ శివారులో మరో దారుణం జరిగింది. ముగ్గురు దుండగులు ఓ బాలికను కిడ్నాప్ చేసి 15 రోజుల పాటు సామూహిక అత్యాచారం చేశారు. అనంతరం ఆమెను పిస్టల్తో కాల్చి నీళ్లులేని 30 అడుగుల లోతు బావిలో పడేసి వెళ్లిపోయారు. తీవ్రంగా గాయపడిన ఆ అమ్మాయి కొన ఊపిరితో కొట్టుమిట్టాడుతోంది. తీవ్ర రక్తస్రావం... శరీరం విలవిల్లాడుతున్నా బతకాలన్న కోరిక ఆ 15 ఏళ్ల బాలిక ప్రాణాలను నిలిపివుంచింది. తెల్లవార్లూ బావిలోనే ఉన్న ఆ బాలిక అరుపులు విని స్థానికులు వచ్చి రక్షించారు. దేశానికే కాకుండా అత్యాచారాలకు కూడా రాజధానిగా మారిన ఢిల్లీలో జరిగింది. ప్రస్తుతం ఆసుపత్రిలో ఇప్పటికీ ప్రాణాపాయ స్థితిలో ఉన్న ఆమె, తన ఉదంతాన్ని పోలీసులకు వివరించింది.

గత నెల 22న పశ్చిమ ఢిల్లీలో పోలీసులు వెల్లడించిన ఆ వివరాల ప్రకారం, పశ్చిమ ఢిల్లీలో నివాసం ఉండే పూనమ్ (పేరు మార్చాం) నవంబర్ 22న తన మొబైల్ ఫోన్ కోసం సిమ్ కార్డును కొనుగోలు చేసేందుకు సాయంత్రం 5 గంటల సమయంలో బయటకు వచ్చింది. ఆమెకు అప్పటికే పరిచయం ఉన్న క్రిషన్ అనే వ్యక్తి ఆమెను కారులో ఎక్కించుకుని తీసుకువెళ్లాడు. ఆపై అతనికి మరో ఇద్దరు మైనర్ బాలురు కలిశారు. వారంతా కలసి 15 ఏళ్ల బాలికను గ్రేటర్ నోయిడాలోని ఓ గ్రామం వెలుపల ఫాంహౌజ్లో బంధించారు. 5 రోజుల పాటు ఆమెపై ఆఘాయిత్యానికి పాల్పడ్డారు. ఓ రోజు రాత్రి ఆ అమ్మాయి వీరి నుంచి తప్పించుకుని పారిపోయిందుకు ప్రయత్నించగా, దుండగులు ఆమెను కాల్చి బావిలో పడేశారు.

చనిపోయిందని భావించి వారు అక్కడి నుంచి వెళ్లిపోయారు. మరుసటి రోజు చుట్టుపక్కలవారు బాధితురాలి కేకలు విని, బావిలో నుంచి ఆమెను బయటకు తీసి పోలీసులకు సమాచారం అందించారు. ఓ మోటార్ బైకుపై ఆ అమ్మాయిని ఓ ప్రైవేట్ ఆస్పత్రికి తరలించి చికిత్స చేయించారు. ఛాతీ, పొత్తికడుపులోకి బుల్లెట్లు దూసుకెళ్లడం వల్ల ఎక్కువగా రక్తస్త్రావం అయినా, ఓ రాత్రి చికిత్స లేకుండా గడిపినా బాధితురాలు బతికుండడం చూసి డాక్టర్లు ఆశ్చర్యపోయారు. బాధితురాలి పరిస్థితి విషమంగా ఉన్నా.. స్పృహలో ఉందని వైద్యులు తెలిపారు. కృష్ణ అనే వ్యక్తి మరో ఇద్దరు మైనర్లతో కలసి ఈ దారుణానికి పాల్పడినట్టు బాధితురాలు పోలీసులకు చెప్పింది.

జి. మనోహర్