ఓల్డ్ సీటీలో సమైక్యాంద్ర సెగ

Posted: 08/07/2013 07:37 PM IST

సమైక్యాంద్రకు మద్దతుగా విశాఖలో బంగారు వెండి వర్తకుల సంక్షేమ సంఘం ఆద్వర్యంలో పూర్ణామార్కెట్ , పాత నగరంలో నిరసన ప్రదర్శన జరిగింది. సమైక్యవాదులు నినాదాలు చేస్తూ కేసిఆర్, దిగ్విజయ్ దిష్టిబొమ్మలను ఉరేగిస్తూ కురుపాం మార్కెట్ నుంచి జగదాంబ కూడలి వరకు ర్యాలీని నిర్వహించారు. జగదాంబ కూడలిలో దిష్టిబొమ్మలను దహనం చేశారు. పాతనగరంలో పలు దుకాణాలను సమైక్యవాదులు మూసివేయించి బంద్ ప్రకటించారు. ఈ సందర్భంగా సంఘ అధ్యక్షుడు గోడి నరసింహాచారి మాట్లాడుతూ సీమాంద్ర ప్రజల మనోభావాలను దెబ్బతీసేలా కాంగ్రెస్ ప్రభుత్వం రాష్ట్ర విభజనపై ప్రకటన చేయడాన్ని సీమాంద్ర ప్రజలు తీవ్రంగా వ్యతిరేకిస్తున్నారన్నారు. పార్లమెంట్ లో తెలంగాణకు బిల్లు అమలు చేయకూడదని, సోనియా నిర్ణయం వెంటనే వెనక్కి తీసుకోపోతే తీవ్ర పరిణామాలు ఎదుర్కోవలసి ఉంటుందని తెలిపారు. అనంతరం పూర్ణామార్కెట్ కూడలిలో సమైక్యాంద్రా నినాదాలతో మానవహారం చేశారు. బస్సులను అడ్డుకున్నారు. రోడ్డు మధ్యలో బైఠాయించి తెలుగు తల్లికి క్షోభ పెడుతున్నావారిని పెట్రోల్ పోసి దహనం చేయాలని నినాదాలు చేశారు. కార్యక్రమాంలో బీఎస్ ఉమామహేశ్వరరావు, బంగారు దుకాణాల యజమానులు, వర్కర్స్, బంగారు వస్తువుల తయారీదారులు పాల్గొన్నారు.

 

పల్లె పోరుబాట

ఆంద్రప్రదేశ్ ను విభజించాలన్న కేంద్రం నిర్ణయాన్ని వ్యతిరేకిస్తూ పల్లెల్లోనూ ఆందోళనలు మొదలయ్యాయి. పలుచోట్ల సోనియాగాంధీ , కేసిఆర్ దిష్టిబొమ్మలను దహనం చేశారు. మండలంలోని చెట్టుపల్లిలో భవన నిర్మాణ కార్మికులు కేసిఆర్ దిష్టిబొమ్మతో నిరసన ప్రదర్శన నిర్వహించారు. రోడ్డుకు అడ్డంగా దుంగలను ఉంచి కాసేపు వాహనాల రాకపోకలను అడ్డుకున్నారు. పెద్దబోడ్డేపల్లిలో వ్యాపారులంతా బంద్ పాటించారు. కూడలిలో గుడారం వేసి పొట్టి శ్రీరాములు విగ్రహానికి పూలమాల వేసి నివాళి ఆర్పించారు. సమైక్యాంద్ర కొనసాగించాలని నినాదాలు చేశారు. కాసేపు కూడలిలో మానవహారంగా ఏర్పాడ్డారు. నర్సీపట్నంలోని విశ్వబ్రాహ్మణులంతా సీబీఎం కాంపౌండ్ నుంచి భారీ ఊరేగింపు నిర్వహించారు. అబీద్ కూడలిలో మానవహారంగా ఏర్పాడ్డారు. పాల్ఘాట్ సెంటర్ లోని పొట్టి శ్రీరాములు విగ్రహం వద్ద నివాళి అర్పించారు. శ్రీకన్య కూడలిలో కేసిఆర్, సోనియాగాంధీ దిష్టిబొమ్మలను దహనం చేశారు.