కోడిగుడ్ల దాడి- బాధాకరం- పురంధేశ్వరి

Posted: 12/07/2013 06:31 PM IST

రాష్ట్ర విభజన విషయంలో కేంద్రం అనుసరించిన తీరుపై ఏఐసిసి అధ్యక్షురాలు సోనియాగాంధీకి లేఖ రాసినట్లు కేంద్ర మంత్రి పురంధేశ్వరి అన్నారు. హైదరాబాద్ లో ఈరోజు ఆమె మాట్లాడారు. విభజన తప్పదని తెలిసిన తర్వాత సీమాంధ్ర ప్రయోజనాలకోసం పట్టుబట్టినట్లు చెప్పారు. మంత్రిపదవికి తాను చేసిన రాజీనామాను ఆమోదించాలని కోరినట్లు చెప్పారు. పోలవరం ముంపు గ్రామాలను ఆంధ్రలో కలపాలని కోరినట్లు తెలిపారు. భద్రాచలం డివిజన్ ప్రాంతాన్ని ఆంధ్రలో కలపాలని కోరినా తమను ఏమాత్రం పట్టించుకోకపోవడం బాధాకరమన్నారు.

 

హైదరాబాద్ ను ఢిల్లీ తరహాలో యూటీ చేయాలని కోరినట్లు చెప్పారు. అసలు ఉమ్మడి రాజధాని అనే అంశం రాజ్యాంగంలో లేదని అన్నారు. శాంతిభద్రతలు గవర్నర్ ఆధీనంలో ఉంచడం అభ్యంతరకరమని అన్నారు. విభజన అనంతరం సీమాంధ్రకు నిధులు ఎలా మంజూరు చేస్తారనే విషయాలు నివేదికలో పేర్కొనలేదని తెలిపారు. మొత్తంగా రాష్ట్ర విభజన విషయంలో తమను విశ్వాసంలోకి తీసుకోకపోవడం భాధాకరమని ఆవేదన వ్యక్తంచేశారు.

 

ఆంధ్రప్రదేశ్ రాష్ట్ర విభజనకు కేంద్రమంత్రి మండలి ఆమోదం తెలిపిన స్థానిక లోక్ సభ సభ్యురాలు, కేంద్ర మంత్రి డి.పురందేశ్వరి నిమ్మకునిరెత్తినట్లు వ్యవహరించడం పట్ల విశాఖపట్నంలోని విద్యార్థి జేఏసీ నాయకులు తీవ్రస్థాయిలో విరుచుకుపడ్డారు. విభజనకు నిరసనగా నగరంలోని పురందేశ్వరి క్యాంపు కార్యాలయాన్ని జేఏసీ నాయకులు చుట్టుముట్టారు. కోడిగుడ్లతో ఆమె నివాసంపై విద్యార్థి జేఏసీ నాయకులు దాడి చేశారు. అయితే కోడిగుడ్ల దాడిని పోలీసులు అడ్డుకునే ప్రయత్నం చేశారు. అ క్రమంలో విద్యార్థి నాయకులు, పోలీసులకు మధ్య తీవ్రస్థాయిలో తోపులాట జరిగింది. దాంతో ఒక్కసారిగా ఉద్రిక్త వాతావరణం ఏర్పడింది.