ఆరోగ్యాన్ని మెరుగుపరిచే పోషక ఆహారాలు

Posted: 11/24/2015 11:46 AM IST

ప్రతిరోజూ తీసుకునే ఆహారంలో కాస్తైనా హాని కలిగించే పదార్థాలు కచ్చితంగా వుంటాయని ఆరోగ్య నిపుణులు చెబుతున్నారు. ఉదాహరణకు.. ఏదైనా ఒక కూర చేసినప్పుడు అందులో ఉప్పు, కారం, నూనె తదితరాలను తప్పకుండావేస్తాం.. అయితే మరికొందరు మాత్రం వీటిని ఎక్కువ పరిమాణంలో చేర్చుకుంటారు. తద్వారా ఏదో ఒక జబ్బు దరిచేరే అవకాశం వుంటుంది. అలా ఏదో ఒక ఆహారం రూపంలో ఇబ్బందులు తప్పనిసరి. అలాంటివాళ్ళకు ఆరోగ్యానికి ఔషధంలా పనిచేసే కొన్ని హెల్దీ వంటకాలను నిపుణులు అందిస్తున్నారు. వాటిని తరచూ ఆమారంలో చేర్చుకుంటే.. నిత్యం ఆరోగ్యంగా మెలగవచ్చునని వారు సూచిస్తున్నారు. మరి.. ఆ ఆహారాలేంటో తెలుసుకుందామా..

* మూలికా కాఫీ : ఒక పాత్రలో శొంఠి, తేనె, ధనియాలు, మిరియాలు, యాలకులు, ఇంకా దాల్చిన చెక్కలు తదితరాలను సమానమైన పరిమాణంలో తీసుకుని బాగా కలుపుకోవాలి. తర్వాత ఈ మిశ్రమాన్ని ఎండబెట్టి పొడికొట్టాలి. ఈ పొడిని కాఫీ పొడికి బదులుగా వాడాలి. చక్కెరకు బదులు బెల్లం వేసుకోవాలి, ఒక కప్పు కాఫీకి ఒక స్పూను పొడి వెయ్యాలి. ఇది తలనొప్పి, ముక్కుదిబ్బడ లాంటి సమస్యలకు మంచి ఉపశమనం కలిగించడంతోపాటు జీర్ణశక్తిని కూడా పెంచుతుంది.

* తీపి గులాబీ రేకులు : ముందుగా.. తాజాగా వున్న గులాబీ రేకులను తీసుకుని నీడలో ఆరబెట్టాలి, బాగా ఆరిన తరువాత వాటిని తేనెలోగాని బెల్లంపాకంలోగాని పదిరోజులపాటు ఊరనివ్వాలి. తర్వాత తింటే చాలా రుచిగా ఉంటుంది. వీటిని తింటే రక్తహీనతను పోగొట్టి శరీరానికి రక్తం పట్టేలా చేస్తాయి.

* వడపప్పు: పెసరపప్పును రెండు గంటలు పాటు నీటిలో నానబెట్టి, ఆ పప్పులో కొద్దిగా పచ్చిమిరపకాయలు, మిరియాలపొడి, శొంఠిపొడి తదితరాలను వేయాలి. అనంతరం ఈ మిశ్రమంలో ఒక నిమ్మకాయను పిండితే చాలా రుచిగా ఉంటుంది. ఇది శరీరానికి బలాన్నిస్తుంది.

* అటుకుల కొబ్బరి: కావలసినన్ని అటుకులను బాగా కడిగి నానబెట్టాలి. నానిన తర్వాత నీటిని వంపేసి, వాటిలో తగినంత కొబ్బరి తురుము, బెల్లమును చేర్చాలి. దీన్ని తింటే రుచిగా ఉంటుంది. ఇంకా శరీరానికి బలాన్ని ఇస్తుంది.