ఆరోగ్యాన్ని మెరుగుపరిచే పప్పుధాన్యాలు..

Posted: 10/08/2015 12:40 PM IST

ఆరోగ్యాన్ని మెరుగుపరిచే కారకాల్లో పప్పుధాన్యాలు కూడా ఒకటి. ఈ పప్పుధాన్యాల్లో శరీరానికి కావలసిన పోషకాలు, న్యూట్రిషన్లు, ఇంకా ఎన్నో ఔషధగుణాలు నిల్వవుంటాయి. వీటిని రెగ్యులర్ గా తీసుకుంటే.. చిరుజబ్బుల నుంచి దూరంగా వుండటమే కాకుండా నిత్యం ఆరోగ్యంగా వుండవచ్చునని పలు పరిశోధనలు కూడా స్పష్టం చేశాయి. ఈ పప్పు గింజల్లో ముఖ్యంగా యాంటీఆక్సిడెంట్లు, విటమిన్లు, ఖనిజాలు పుష్కలంగా వుంటాయి. బాదం, జీడిపప్పు, పిస్తా, వాల్‌నట్, వేరుశెనగపప్పుల్లో వుండే అసంతృప్త కొవ్వులు గుండె ఆరోగ్యానికి దోహదం చేస్తాయి. కానీ.. ఈ పప్పు గింజ‌లు ఎంత ఆరోగ్యకరమైనప్పటికీ మితంగానే తీసుకోవాలి. అప్పుడే వీటితో కలిగే ప్రయోజనాలు ఉంటాయి.

ప‌ప్పు గింజ‌ల‌లో ఉండే అన్‌సాచురేటెడ్ కొవ్వులు చెడు కొలెస్ట్రాల్‌ను త‌గ్గిస్తాయి. వీటిలో ఉండే ఒమేగా 3 ఫ్యాటీ ఆమ్లాలు రక్తనాళాలు ఆరోగ్యంగా ఉండేందుకు దోహదం చేస్తాయి. గుండె లయ తప్పటాన్ని నిరోధించి, గుండెపోటు రాకుండా రక్షిస్తాయి. ముఖ్యంగా ప‌ప్పు గింజ‌ల్లో పీచు స్థాయి కూడా ఎక్కువ‌గా ఉండటం వల్ల కొలెస్ట్రాల్‌ తగ్గటానికే కాదు కడుపు నిండిన భావనా కలిగిస్తుంది. దీంతో త్వరగా ఆకలి వేయదు. జీర్ణక్రియను మెరుగుపరుస్తుంది. మధుమేహం బారినపడకుండా నివారిస్తుంది. వీటిలో మెండుగా ఉండే విట‌మిన్ ఇ రక్తనాళాల్లో పూడికలను నివారిస్తుంది. అందువల్ల గుండెపోటు, పక్షవాతం వంటి జబ్బులు రాకుండా కాపాడుతుంది. జీడిపప్పును ఇతర పప్పులతో కలిపి వంటలో ఉపయోగిస్తే మాంసకృతులన్నీ తీసుకున్నట్టవుతుంది.

పిస్తాలో విటమిన్‌ ఏ, సి, బి6 ఉంటాయి కాబట్టి రోగనిరోధకశక్తినీ పెంపొదిస్తాయి. గాలికి, వెలుతురుకు గురైతే త్వరగా రంగు, రుచి మారిపోతాయి. వేరుశనగల్లో ఒలియెక్‌ కొవ్వు ఉంటుంది. మోనో అసంతృప్తకొవ్వు ఆమ్లాలూ ఎక్కువే. అందువల్ల వీటిని తరచుగా తీసుకుంటే గుండె జబ్బుల బారినపడకుండా కాపాడతాయి. ఇన్ని ఆరోగ్య ప్రయోజనాలు వుండటం వల్లే ఈ పప్పు ధాన్యాలను తరచూ ఆహారాల్లో తీసుకోవాల్సిందిగా వైద్యులు సలహా ఇస్తున్నారు.