నోటి దుర్వాసనకు చెక్ పెట్టాలంటే...

Posted: 09/22/2015 11:19 AM IST

చాలామంది నోటి దుర్వాసన సమస్యతో ఎన్నో ఇబ్బందులు ఎదుర్కొంటుంటారు. దీనివల్ల నలుగురిలో వున్నప్పుడు మాట్లాడానికిగానీ, నవ్వడానికిగానీ వీలుండదు. ఇటువంటివారు ఎన్నిసార్లు బ్రష్ చేసినా, మెరుగైన టూత్ పేస్టులు వాడినా, మౌత్ ఫ్రెషనర్ లాంటివి ఉపయోగించినా.. నోటి దుర్వాసన తగ్గదు. అవి కొద్దిసేపటివరకు మాత్రమే నోటి దుర్వాసనను కంట్రోల్ చేస్తాయి. ఆ తర్వాత మళ్లీ అదే పరిస్థితి. మరి ఈ సమస్య నుంచి బయటపడటం ఎలా? ఇందుకు గల కారణాలేంటి? అనే విషయాలపై నిపుణులు పరిశోధించగా.. కొన్ని ఆహారాల వల్ల ఈ సమస్య వస్తుందని కనుగొన్నారు. ఈ నేపథ్యంలోనే నోటిదుర్వాసనకు చెక్ పెట్టే కొన్ని జాగ్రత్తలు సూచిస్తున్నారు. రెగ్యులర్ గా తీసుకునే ఆహారంలో కొన్ని జాగ్రత్తలు పాటిస్తే నోటి దుర్వాసన సమస్య నుంచి సులభంగా బయటపడవచ్చునని వారు చెబుతున్నారు.

* వెల్లుల్లి.. దీనిని వీలైనంత దూరంగా ఉంచాలి. ఎందుకంటే.. ఇందులో సల్ఫర్ అనే మూలకం వుంటుంది. దాని కారణంగా నోటి నుంచి, శరీరం నుంచి దుర్వాస వస్తుంది. కనుక వెల్లుల్లిని సాధ్యమైనంత తక్కువగా తీసుకోవాలి. లేనిపక్షంలో నోటి దుర్వాసన సమస్య నుంచి విముక్తి పొందలేమని నిపుణులు హెచ్చరిస్తున్నారు.

* పాలు.. నోటి నుంచి దుర్వాసన రావడానికి పాలు కూడా ఒక కారణమే అంటున్నారు నిపుణులు. ఎందుకంటే.. పాలలో ప్రోటీన్లు ఎక్కువగా వుంటాయి. వీటితోపాటు బ్యాక్టీరియా కూడా ఎక్కువగానే ఉంటుంది. ఇవి చాలామందికి పడవు. ఇవి పొట్టలో సల్ఫర్ కాంపౌడ్స్‌ని విడుదల చేస్తాయి. పలితంగా అవి నోటి దుర్వాసనకు కారణమవుతాయి. కాబట్టి.. పాలను రెగ్యులర్ గా తగిన మోతాదులో తీసుకోవాలని సూచిస్తున్నారు. పాలలో ఏదైనా మిక్స్ చేసుకుని తాగితే మంచిదని చెబుతున్నారు.

* అన్నిటి ముఖ్యమైన విషయం ఏమిటంటే.. రోడ్డు సైడ్‌లో లభించే కబాబ్స్, జంక్ ఫుడ్‌‌ల జోలికి వెళ్లకూడదని నిపుణుల సలహా! అటువంటి ఆహారాల్ని ఎక్కువ మోతాదులో తీసుకుంటే.. అవి కూడా నోటి దుర్వాసను కారణమవుతాయని చెబుతున్నారు. కాబట్టి.. వాటి జోలికి వెళ్లకుండా వుండాలని నిపుణులు అంటున్నారు.