మొక్కజొన్న.. సుగుణాల నిధి!

Posted: 09/02/2015 01:21 PM IST

Corn health benefits home remedies healthy food items

ప్రకృతి సహజంగా లభించే ఆహారాల్లో ఔషధగుణాలు పుష్కలంగా వుంటాయని నిపుణులు చాలా సందర్భాల్లో వెల్లడించారు. అలాంటి వాటిల్లో మొక్కజొన్న ఒకటి. నిజానికి మొక్కజొన్న చాలామందికి ఇష్టముండదు. ఎవరో కొద్దిమంది మాత్రమే వీటిని ఇష్టంగా తీసుకుంటారు. అలా తీసుకున్నవారు ఆరోగ్యంగా వుంటారని, అందరూ వీటిని రెగ్యులర్ డైట్ లో చేర్చుకోవాలని వారు సలహా ఇస్తున్నారు. ఇంతకీ.. దీనివల్ల కలిగే ప్రయోజనాలు ఏంటో తెలుసుకుందామా..

మొక్కజొన్నలో లినోలికాసిడ్‌, ఫోలికాసిడ్‌, విట‌మిన్ ఇ, బి1,బి6, నియాసిన్‌, రిబోఫ్లావిన్ వంటి పోషకాలు పుష్కలంగా దాగివుంటాయి. ఇన్ని పోషకాలు దాగిన మొక్కజొన్న చిన్నారుల‌కు, మ‌ధుమేహ‌రోగుల‌కు ఎంతో మంచిందని అంటున్నారు. అవి జీర్ణక్రియ‌ను మెరుగుప‌రిచి.. మ‌ల‌బ‌ద్దకాన్ని నివారిస్తాయి. అలాగే ర‌క్తలేమిని త‌గ్గిస్తాయి. ముఖ్యంగా మొక్కజొన్నల్లో కొవ్వును త‌గ్గించే సుగుణం ఉంది. మొక్కజొన్నలు ప‌చ్చివి, కాల్చిన‌వి, ఉడ‌క‌బెట్టిన‌వి ఏవైనా స‌రే.. శ‌రీరంలోని కొవ్వు పని పడతాయట. కొవ్వును కరిగించి నియంత్రిస్తాయని అంటున్నారు.

ఇన్ని పోషకాలు కలిగిన ఈ మొక్కజొన్నని రెగ్యులర్ గా తీసుకుంటే ఆరోగ్యంగా మెలగవచ్చునని నిపుణులు సూచిస్తున్నారు. అంతేకాదు.. దీనివల్ల సౌందర్య ప్రయోజనాలు కూడా కలుగుతాయని చెబుతున్నారు. ఇందులో వుండే పోషకాలు చర్మాన్ని తాజాగా వుంచడంతోపాటు ఇతర చర్మవ్యాధులు దూరమవుతాయి.